Búgin Túrkistan oblysy ákimdiginiń memlekettik qyzmetkerleri Shymkent qalasynan oblys ortalyǵy - Túrkistan shaharyna kóshti. Tarıhı sátte jolbasshy bolǵan óńir basshysy Janseıit Túımebaev eki ǵasyr boıy Qazaq handyǵynyń astanasy bolǵan, mańyzdy sheshimder qabyldanǵan Túrkistanǵa atbasyn buryp, qyzmet etýge bara jatqan azamattar, jalyndy jastar tarıh aldyndaǵy uly murattarynyń birin oryndap jatyr deýge tolyq negiz bar ekenin aıtty.
"Árbir memlekettiń, árbir oblystyń, árbir qalanyń tarıhynda jaýapty kezeńder bolady. Bıyl 19 maýsymda Elbasy Jarlyǵymen burynǵy Ońtústik Qazaqstan oblysy Túrkistan oblysy bolyp qurylyp, onyń ortalyǵy dep Túrkistan qalasy bekitildi. Bul tarıhı sheshimge 2 aı jeter-jetpes ýaqyttyń ózinde biz tynbaı jumys istep, Elbasy Jarlyǵyn oryndaýǵa bar kúshimizdi saldyq. Túrkistan qalasynda oblys ákimdigine qarasty 24 basqarma men oblystyq máslıhat, qoǵamdyq keńes pen departament qyzmetkerleri otyratyn keńseler daıarlandy. Búgin biz úlken kóshti bastaıyn dep otyrmyz. Kezinde Elbasy Astanaǵa kósher kezde «Almatyǵa syımaı emes, Almatyny qımaı ketip baramyz» degen eken. Biz de Shymkentke syımaı emes, ony qımaı ketip baramyz. Túrkistan — bar qazaqtyń rýhanı astanasy. Sondyqtan ony damytýǵa, órkendetýge kúsh salýymyz qajet. Shejireli qalanyń týrısik áleýeti kóterilip, jańa jumys oryndary ashylady. Mine, endi Túrkistan oblysy men Túrkistan qalasynyń jańa dáýiri bastaldy ", - dedi ákim.
Shymkentten kóship shyǵý saltanatty sharasynda belgili jazýshy, «Alash» halyqaralyq syılyǵynyń laýreaty Marhabat Baıǵut pen Memleket jáne qoǵam qaıratkeri Shalataı Myrzahmetovter quttyqtaý sóz sóılep, ákimdik qyzmetkerlerine qyzmette jetistikter men tabys tiledi. Shara aıasynda shyǵaryp salý sharasyna kelýshilerge qymyz sýsyny men baýyrsaq taratylyp, tarıhı kóshtiń kórigin ashty.
Aımaq basshysy Janseıit Túımebaev bastaǵan kóshtiń quramynda oblys ákiminiń orynbasarlary jáne apparat basshysy, oblystyq máslıhat hatshysy men apparaty, oblystyq qoǵamdyq keńestiń tóraǵasy jáne apparaty, «Nur Otan» partıasynyń oblystyq fılıaly tóraǵasynyń birinshi orynbasary jáne qyzmetkerleri, oblystyń zıaly qaýym ókilderi, oblys ardagerleri, quzyrly organ basshylary, ákim apparaty qyzmetkerleri, 28 aýmaqtyq departamenttiń basshylary men qyzmetkerleri, 24 oblystyq basqarma basshylary men qyzmetkerleri, respýblıkalyq jáne jergilikti BAQ ókilderi syndy, jalpy sany, 1 myńǵa jýyq adam bar.
11 avtobýsqa jaıǵasqan kósh quramyn Túrkistan shaharynyń ákimdigi kútip aldy.
Eske salaıyq, bıyl, 19 maýsymda Elbasy – Ult Kóshbasshysy Nursultan Ábishuly Nazarbaev Ońtústik Qazaqstan oblysyn Túristan oblysy dep qaıta qurý jáne onyń ortalyǵyn Shymkentten Túrkistan qalasyna kóshirý týraly tarıhı Jarlyqqa qol qoıǵan-dy. Elbasynyń bul sheshimi – Túrkistannyń qaıta túlep, elimizdiń ósip-órkendeýine úles qosatyn jańa ortalyqqa aınalýyna jol ashty. Oblys ortalyǵy atanǵan Túrkistan qalasy endigi jerde elimizdiń ǵana emes, búkil Orta Azıanyń, tutas túrki áleminiń belgili saýda-ekonomıkalyq jáne rýhanı-mádenı ortalyqtarynyń biri bolary sózsiz.
