Jol aqysyn sms-habarlama jáne mobıldik qosymsha arqyly tóleý aıasynda elimizdegi «Bılaın» uıaly baılanys operatory jolaýshylar úshin arnaıy naýqan engizip, onyń aıasynda ádettegi 90 teńge kólemindegi jol aqysynyń 89 teńgesin jolaýshy úshin tóleýge daıyn. Bul jóninde Búgin qalalyq ákimdikte ótken Astana qalasynyń Qoǵamdyq keńesiniń otyrysynda «Astana LRT» JSHS basqarma tóraǵasy Bekmyrza Igenberdıev málimdedi, dep habarlaıdy qazaly.kz.
Bekmyrza Igenberdıev Astanada jol aqysyn mobıldik qosymsha nemese sms-habarlama arqyly tóleýge bolatynyn málimdegen bolatyn.
«Bılaın uıaly baılanys operatory jolaýshylarǵa arnalǵan naýqan usynady. Bılaın mobıldi baılanysty qoldanatyn jolaýshylar jolaqyny SMS arqyly tólegen jaǵdaıda, 1 teńge tólese, qalǵan 89 teńgeni Bılaın tóleıtin bolady. Aksıa qyrkúıek aıynda bastalyp, bir aıǵa sozylady. Sodan keıin 2018 jyldyń sońyna deıin ár dúısenbi saıyn júrgiziledi», - dedi Igenberdıev.
Sonymen qatar, JSHS basshysy málim etkendeı, aldaǵy ýaqytta kobrendıng kartalary iske qosylatyn bolady.
«Bul jolaýshylarǵa eki karta ornyna bir karta qoldaný múmkindigin beredi. Paıdalanýshyǵa mindetti túrde kólik kartalaryn satyp alý qajettiligi bolmaıdy. Olar ózderine qyzmet kórsetetin bankterden dýal kartalar ala alady. Pılottyq joba aıasynda Eýrazıa bankimen birlesip, alǵashqy 3-5 myń karta iske qosylady», - degen ol aldaǵy ýaqytta basqa bankterdi de iske qosý josparda bar ekenin aıtty.
Qoǵamdyq tyńdaý barysynda málim bolǵandaı, saralanǵan tarıftiń engizilýimen astanalyq tasymaldaýshylardyń tabysy artqan. Jańa tarıf engizilgen alǵashqy aptalardyń qorytyndylary boıynsha avtoparkterdiń tabysynyń 15% kóleńkeli tabystan shyqqan.
«Aldaǵy ýaqytta Astananyń qoǵamdyq kólik paıdalanýshylarynda kólik kartalaryn mobıldi qosymsha arqyly qashyqtyqtan toltyrý múmkindigi paıda bolady. Beeline men Kcell/Activ uıaly baılanys operatorlarynyń klıentteri arnaıy qysqa nómirge kólik kartasynyń nómiri men tólem somasy bar SMS joldap, kólik kartasynyń teńgeriminiń qashyqtyqtan toltyra alady», - dedi basqarma tóraǵasy.
