Almaty qalasy İshki ister departamentiniń baspasóz qyzmetinde qazaq tilinde aqparat jazatyn maman joq degenge óz basym sengim kelmeıdi. Sebebi baspasóz bóliminiń resmı ókili — Saltanat Ázirbek hanym qazaq tilinde saýatty sóıleı alady. Biraq baspasóz baıandarynyń bári tek qana orys tilinde. Memlekettik tilde birde bir aqparat kelmeıdi. Nege? Qalalyq İİB qazaq tildi jýrnalıserdi mensinbeı me, álde qazaq tildi jýrnalıser ózderi aýdaryp alsyn dep oılaı ma? Atalǵan máseleniń sebebin surap, bizge aqparatty qazaq tilinde jiberýlerin ótingen bolatynbyz. Ókinishtisi «Qazaq tilinde aqparatty eki kún kútesizder» degen jaýap aldyq. Qazaq tilinde aqparat taratý qalalyq İİB úshin sonshalyq qıyn sıaqty. Dál búgin qazaq tilinde jibergen aqparattyq suranymyma orys tilinde eki bet jaýap kelip tur. Bul ne degen masqara? «Qajet bolsa óziń aýdaryp al» degenderi bolar. Biraq biz qaıta habarlasyp, qazaq tilinde jaýap berýlerin zańdyq turǵydan talap etetinimizdi aıttyq. Bul osy basqarmada ǵana oryn alyp otyrǵan olqylyq emes, kóptegen resmı uıymdar qazaq tiline dál osyndaı beıjaılyq tanytady. Osydan keıin «qazaq tildi jýrnalıser aqparatty kesh beredi» dep taǵy birazyńyz ókpe aıtasyzdar. Qazaq tildi jýrnalıs resmı aqparatty aýdaryp otyrǵanda, orys redaksıasy orys tildegi daıyn mátindi jarıalaı salady. Dál osy máseleni ózara sheship alarmyz dep Saltanat hanymnyń jeke pochtasyna eki ret qazaq tilinde aqparat jiberýin ótinip hat jazdyq, kómekshisine habarlastyq... Bizdiń ótinishimizge pysqyrǵanda joq. Óz elińde turyp, óz tilińde aqparat ala almaý ne degen beısharalyq...
