Rásim barysynda Nursultan Nazarbaevqa Lıvan Respýblıkasynyń Tótenshe jáne ókiletti elshisi Jıskar Ál-Hýrı, Ýkraınanyń Tótenshe jáne ókiletti elshisi Ivan Kýleba, Brazılıa Federatıvtik Respýblıkasynyń Tótenshe jáne ókiletti elshisi Marsıa Donner Abreý, Germanıa Federatıvtik Respýblıkasynyń Tótenshe jáne ókiletti elshisi Tılo Klınner, Pákistan Islam Respýblıkasynyń Tótenshe jáne ókiletti elshisi Imtıaz Ahmad Kazı senim gramotalaryn tapsyrdy. Bul jaıynda Qamshy.kz aqparat agenttigi Aqordanyń baspasóz qyzmetine silteme jasap habarlaıdy.
Qazaqstan Prezıdenti rásimge qatysýshylardy dıplomatıalyq qyzmetteriniń resmı túrde bastalýymen quttyqtap, bul ár dıplomattyń ómirindegi jaýapty da qýanyshty sát ekenin atap ótti.
Memleket basshysy Astananyń 20 jyldyq mereıtoıy atap ótilgenine toqtalyp, qysqa ýaqyt ishinde Qazaqstan elordasy kóp ultty halqymyzdy biriktirgenin, sondaı-aq tyń ıdeıalar men ınovasıalarǵa jol ashqanyn aıtty.
– Astana beıbitshilik pen kelisimniń jańa platformasy retinde tanyldy. Munda Eýrazıalyq ekonomıkalyq odaq, Shanhaı yntymaqtastyq uıymy, Eýropadaǵy qaýipsizdik jáne yntymaqtastyq uıymy, Azıadaǵy ózara is-qımyl jáne senim sharalary keńesi, Islam yntymaqtastyǵy uıymy, EKSPO kórmesi aıasynda mańyzdy qujattar qabyldandy, – dedi Qazaqstan Prezıdenti.
Nursultan Nazarbaev Álemdik jáne dástúrli dinder kóshbasshylarynyń VI sezin ótkizý máselelerine erekshe toqtalyp, elderdiń delegasıalaryn osy sharaǵa belsendi atsalysýǵa shaqyrdy.
– Jýyrda biz úzdik tájirıbelerge negizdelgen jańa «Astana» halyqaralyq qarjy ortalyǵyn ashtyq. Elderińizdi osy ortalyqtyń jumysyna atsalysýǵa shaqyramyn, – dedi Qazaqstan Prezıdenti.
Memleket basshysy Qazaqstannyń kórshiles eldermen ekonomıkalyq yntymaqtastyqty nyǵaıtý maqsatymen zamanaýı ınfraqurylymdy belsendi damyta túskenin, «Batys Qytaı – Batys Eýropa» halyqaralyq kólik dáliziniń 2,7 myń shaqyrymǵa sozylatyn qazaqstandyq bóliginiń qurylysy tolyq aıaqtalǵanyn atap ótti.
– Osy aıda Aqtaý qalasynda ótken Besinshi Kaspıı samıtinde Ázerbaıjan, Iran, Qazaqstan, Reseı jáne Túrikmenstan basshylary Kaspıı teńiziniń quqyqtyq mártebesi týraly konvensıaǵa qol qoıdy. Onda qaýipsizdik jáne ekologıa máselelerimen qatar, Kaspıı mańy elderiniń ınfraqurylymyn odan ári damytý, kólik jelisiniń áleýetin arttyrý qarastyrylǵan. Quryq portynyń iske qosylýy Transkaspıı baǵyty boıynsha júk tasymaldaýdy qamtamasyz etti. Sonyń arqasynda, 2020 jylǵa qaraı búdjetke jylyna 5 mıllıard dollardan astam qosymsha kiris túsedi, al Qazaqstan ónimderi álemniń 120-dan astam eliniń naryǵyna jetkiziledi, – dedi Nursultan Nazarbaev.
Memleket basshysy Qazaqstannyń syrtqy saıasaty syndarly yntymaqtastyq pen pragmatızm qaǵıdattaryna negizdelgenin atap ótip, Astana eki jaqty jáne kóp jaqty baılanystardy odan ári damytýǵa basa kóńil bóletinin aıtty.
Qazaqstan Prezıdenti Germanıamen búgingi eki jaqty qarym-qatynasymyz strategıalyq deńgeıge kóterilgenin atap ótip, Federaldyq Prezıdent Frank-Valter Shtaınmaıerdiń Astanaǵa alǵashqy resmı sapary jáne «EKSPO-2017» kórmesine qatysýy eki el arasyndaǵy yntymaqtastyqqa tyń serpin bergenine toqtaldy.
– Biz germanıalyq áriptesterimizben birlesip, Qazaqstanǵa tórtinshi ónerkásiptik revolúsıa elementterin engizý, ozyq tehnologıalar men ınvestısıa tartý jónindegi jumysty jalǵastyrýǵa nıettimiz. Qazaqstandaǵy nemis dıasporasy elderimiz arasyndaǵy «altyn kópir» dep bilemiz, – dedi Nursultan Nazarbaev.
Memleket basshysy ótken jyldar ishinde Qazaqstan men Ýkraına edáýir jetistikterge qol jetkizgenin aıtyp, eki eldi dostyq pen yntymaqtastyqqa negizdelgen tarıhı baılanystar biriktiretinin atap ótti.
– Byltyr elderimizdiń ózara saýda aınalymy 19 paıyzǵa ósti. Qazaqstanda Ýkraınanyń qatysýymen jumys isteıtin kásiporyndardyń sany da artyp keledi. Biz ekonomıkalyq yntymaqtastyǵymyz, ásirese óndiris pen aýyl sharýashylyǵyndaǵy baılanystarymyzdy odan ári órkendete túsýimiz qajet, – dedi Qazaqstan Prezıdenti.
Nursultan Nazarbaev Pákistan Qazaqstannyń Ońtústik Azıadaǵy mańyzdy ári perspektıvaly seriktesi sanalatynyn atap ótip, Pákistan Shanhaı yntymaqtastyq uıymynyń tolyq múshesi retinde onyń jumysyna tyń serpin beretinine senim bildirdi.
– Saýda-ekonomıka salasyndaǵy baılanysty nyǵaıtý maqsatymen birlesken Úkimetaralyq komısıa men İskerlik keńestiń jumysyn jandandyryp, tıisti «Jol kartasyn» qabyldaý qajet, – dedi Memleket basshysy.
Qazaqstan Prezıdenti bıyl Brazılıamen aradaǵy dıplomatıalyq qarym-qatynastardyń ornaǵanyna 25 jyl bolǵanyn aıtyp, bul eldiń Latyn Amerıkasyndaǵy róli zor ekenin atap ótti.
– Men 2016 jylǵy qyrkúıekte «Úlken jıyrmalyq» forýmy aıasynda Brazılıa Prezıdenti Mıshel Temermen kezdestim. Onda biz eki jaqty qatynastardy jańa sapaly deńgeıge kóterý joldaryn talqyladyq. Osyǵan oraı, tehnologıa, aýyl sharýashylyǵy, mashına jasaý, jeńil ónerkásip salalarynda birlesken jobalardy iske asyrýdy jandandyrý qajet. Ornatylǵan vızasyz rejim elderimizdiń mádenı-gýmanıtarlyq yntymaqtastyǵyn ilgeriletýge septigin tıgizedi dep oılaımyn, – dedi Nursultan Nazarbaev.
Memleket basshysy shırek ǵasyr ishinde Lıvanmen dostyq baılanystarymyz ózara túsinistik pen áriptestik rýhynda qalyptasqanyn aıtty.
– Búginde Qazaqstanda Lıvannyń birqatar kompanıalary tabysty jumys isteýde. Birlesken Úkimetaralyq komısıa qurý, isker toptar ókilderiniń ózara saparlaryn uıymdastyrý eki jaqty baılanysqa tyń serpin beretinine senimdimin. Biz Beırýttiń Taıaý Shyǵys aımaǵynda turaqtylyq pen qaýipsizdikti ornatýǵa baǵyttalǵan kúsh-jigerin joǵary baǵalaımyz, – dedi Qazaqstan Prezıdenti.
Sońynda Nursultan Nazarbaev rásimge qatysýshylardy Qazaqstandaǵy dıplomatıalyq mısıalarynyń bastalýymen taǵy da quttyqtap, olardyń qyzmetteri elderimiz arasyndaǵy dostyq pen senimdi odan ári nyǵaıta túsetinine senim bildirdi.
