Atyraýda bıznes sýbektileriniń irgeles aýmaqtardy abattandyrý erejesin buzýyn anyqtaý boıynsha reıdtik is-sharalar bastaý aldy, dep habarlady Atyraý qalasy ákimdiginiń baspasóz qyzmeti.
Profılaktıkalyq reıd búgin, 12 shildede bastaldy. SHOB sýbektileri tazalyq pen tártipti saqtaý, sondaı-aq jasyl kóshetterdi kútip-baptaý jáne qorǵaý boıynsha tekserildi.
Olardyń arasynda dúkender, sýpermarketter, saýda úıleri men qoǵamdyq tamaqtandyrý oryndary bar.
Tekserýshi toptyń quramyna Atyraý qalalyq kásipkerlik bóliminiń, sondaı-aq quqyq qorǵaý organdarynyń mamandary kirdi. Reıdtiń alǵashqy kúni 5 bıznes obektisi tekserildi. Olardyń kópshiliginde buzýshylyqtar anyqtaldy.
- Qala ákiminiń qalany aralaýy barysynda kásipkerlerdiń irgeles aýmaqty abattandyrý jáne kútip-ustaý erejelerin saqtamaýy boıynsha óte kóp buzýshylyqtar anyqtalǵan bolatyn. Zańdy tulǵalarǵa anyqtalǵan buzýshylyqtardy joıý jóninde 100-deı uıǵarym berildi. Búgingi kúni birneshe kásipkerge aýmaǵynda turmystyq jáne qurylys qaldyqtarynyń bolǵany, irgeles jer ýchaskesin óz betimen ıelenip alǵany, aýmaǵynyń syrtqy túriniń talapqa saı bolmaǵany úshin aıyppuldar salyndy. Keıbir zańdy tulǵalarǵa kemshilikterdi joıý týraly eskertýler jasaldy, - dedi Atyraý qalalyq Kásipkerlik jáne týrızm bóliminiń basshysy Rýslan Dáýletov.
Osyǵan deıin Atyraý qalasynyń ákimi Alımuhammed Quttumuratuly oblys ortalyǵynyń birneshe yqsham aýdanyn tekserip, qaramaǵyndaǵylarǵa qozǵalys kóp jol qıylystaryn jeńildetý, sondaı-aq qala ortalyǵyndaǵy qoqys pen qurylys qaldyqtary máselelesi, turǵyn úılerdiń qasbetterindegi aqaýlardy joıý jáne jol jıegindegi ıesiz jer ýchaskelerin kórkeıtý boıynsha birqatar naqty tapsyrmalar bergenin eske salamyz.
- Biz qala turǵyndaryn tazalyq saqtaý mádenıetine ádettendirýimiz qajet. Birinshi kezekte – qalany tazalaıtyn komýnaldyq qyzmetterdiń jumysyn kúsheıtý kerek, sońǵy ýaqytta turǵyndar bizdiń atymyzǵa kóptegen renishter bildirip jatady. Ekinshiden – kásipkerlerdi ózderiniń irgeles aýmaqtaryn kóriktendirýge, ýchaskelerindegi eski, qısaıǵan qorshaýlardy, qurylys qoqystaryn, aram shópterdi joıýǵa daǵdylandyrý qajet. Úshinshiden – turǵyn úılerdiń qasbetterin jaqsartý jáne jol jıegindegi jerlerdi, qalany sándi, estetıkalyq túrge keltirý qajet. Osynyń barlyǵyn biz aǵymdaǵy jyldyń sońyna deıin sheshýimiz qajet, - dep tapsyrma berdi Alımuhammed Quttumuratuly.
