Ózbekstanda telearnalarǵa eldiń tuńǵysh prezıdenti Islam Kárimovtiń esimin atamaý jóninde buıryq kelipti. Atalmysh buıryq ulttyq teleradıokompanıa quramyndaǵy barlyq telearnalarǵa qatysty. Bul týraly jergilikti arnalardyń birinde jumys isteıtin jýrnalıs habarlaǵan eken, dep jazady Qamshy.kz aqparat agenttigi Azattyq radıosyna silteme jasap.

Júrgizýshiniń sózine sensek, endigi efırden taralatyn barlyq baǵdarlamada Ózbekstannyń tuńǵysh prezıdenti Islam Kárimovtiń esimi atalmaýy tıis. Ári mundaı buıryqty prezıdenttiń memlekettik keńesshisi Haırıddın Sultanov beripti.

«Kárimovtiń esimi efırde atalsa, bastaryńmen jaýap beresińder», - dep dóp basyp aıtypty Sultanov.

Mundaı buıryqtyń shyn mánisinde bolǵanyn ózbekstandyq telearnalardyń biriniń bas redaktory da rastaǵan. Aıtýynsha, jyl basynan beri Islam Kárimov jaıly azyraq aıtyp, Shavkat Mırzıeev jaıly kóbirek aıtýǵa keńes berilgen. Tipti efırde Islam Kárimovtiń sýretteri men eskertkishterin kórsetýge de bolmaıdy.

Aıta keteıik, 2017 jyly 31 tamyzda Ózbekstannyń táýelsizdik kúnine oraı uıymdastyrylǵan sharada quttyqtaý sóz sóılegen Mırzıaev Karımovtyń "týǵan eli men memleket aldynda sińirgen uly qyzmetin" atap ótip, eldiń esinde máńgi saqtalatynyn aıtqan.

Mırzıaev este qaldyrý sharalarynyń ári qaraı da jalǵasa beretinin aıtqan. Dál osy kúni Tashkenttegi "Oksaroı" rezıdensıasynyń aldynda Karımovke arnalǵan eskertkish ashyldy.

Sol jyly qyrkúıek aıynda Samarqand qalasynda Karımovke arnalǵan taǵy bir eskertkish ashylǵan.

2018 jyly 30 qańtarda Ózbekstan Islam Karımovtiń 80 jyldyǵyn atap ótti. Bul kúni eldiń Karshı qalasynda Islam Karımovke arnalǵan eskertkishtiń saltanatty ashylýy boldy. Al Samarqandta birinshi prezıdentke arnalǵan memorıaldy keshenniń qurylysy aıaqtaldy.