Almatyda osy demalys kúnderi dástúrge aınalǵan «Kóktóbe Opera-2018» mýzyka festıvali ótti. Ashyq aspan astynda bolǵan keshte kórermender syrly sazǵa toly álemdik klasıka jaýharlaryn tyńdady. Sondaı-aq, bıyl ıtalıalyq tenor, operanyń «Oskaryn» jeńip alǵan Vınchenso Konstansa arnaıy shaqyrylypty. Daýysy kópti tánti etken ártis keshte birneshe shyǵarma oryndady. 2 kúnge sozylǵan mýzyka festıvalinde uıymdastyrýshylar tyńdarmandardy taǵy da nemen qýantty?
Almatylyqtar eshqashan eskirmeıtin, zaman aǵymynan esh qalmaıtyn, esesine, kóńildi jadyratyp, júrekti terbeıtin áýenderdi tyńdaýǵa asyqty. Bıylǵy «Kóktóbe Opera» klasıkalyq mýzyka festıvali júzdegen kórermendi jınady. Tyńdarmandar teńiz deńgeıinen 1100 bıiktikte, ıaǵnı kókte otyryp, ashyq aspan astynda sımfonıalyq orkestrdiń súıemeldeýimen án shyrqaǵan úzdik opera solıserin jáne opera juldyzdaryn tyńdady. Al keshke álemge áıgili dırıjer Alan Bóribaev jetekshilik etti.
«Qazaqstanda Djakomo Pýchchınıdiń «Vıllısy» operasynan alǵash ret arıa oryndaldy. Buǵan deıin mundaı bizde bolǵan emes. Bul óte qyzyqty. Sebebi, ashyq aspan astynda, taza aýada «'O sole mio» shyǵarmasy burynǵydan da áserli, erekshe estileri sózsiz», – dedi Abaı atyndaǵy Qazaq memlekettik akademıalyq opera jáne balet teatrynyń dırektory Asqar Bóribaev.
2016 jyly festıválge Ispanıanyń tenor daýysty ánshisi Aleksandro Roı qatyssa, byltyr Italıanyń tenor daýysty opera ánshisi Stefano La Kolla kelgen edi. Al bıyl kópti talantymen tańǵaldyrǵan, Eýropa sahnalaryn baǵyndyrǵan Vınchenso Konstansa óner kórsetti. Almatylyqtar ony erekshe yqylaspen qarsy aldy.
«Men ókinishke qaraı, Almatyda jıi bolmaımyn. Biraq osy kórgenimniń ózi meni bir silkintip tastady. Balet, orkestr jáne dırıjerler qosynynyń birigip, sondaı úılesimdilikte ótkizgen konsertin kórip, keremet demalyp qaldym. Óte joǵarǵy deńgeı, tańǵajaıyp kesh! Bul bizdiń Qala kúnin qalaı atap ótetindigimizdiń belgisi. Sapaly, qundy sharany kórdim dep qýanyshpen aýyz toltyryp aıta alamyn», – dedi aktrısa Samal Eslámova.
Keshti áserli ótkizý úshin uıymdastyrýshylar tyńǵylyqty daıyndalypty. Operadaǵy arıalardan soń, sahnaǵa balet maıtalmandary da shyqty.
«Jalpy ashyq aspan astynda konsert ótkizý, birneshe stıldiń basyn qosý álemde bar úrdis. Mundaı sharalar Germanıada, Amerıka Qurama Shtattarynda, Fransıada bar. Bizdiń elde de osyndaı festıváldi ótkizgenimiz zor qýanysh, mártebe boldy», – dedi Abaı atyndaǵy Qazaq memlekettik akademıalyq opera jáne balet teatrynyń solısi Emıl Sakalov.
«Kóktóbe Opera-2018» sharasy eki kúnge sozyldy. Áıtse de, mýzykany shyn yqylasymen jaqsy kóretin tyńdarmandar ártisterdi sahnadan jiberleri kelmeı, uzaq qol soǵyp, qoshemet kórsetti.
