Elimizde otandyq ónimge suranys artýda. Almatyda jyl basynan beri 5 kásiporyn iske qosylǵan. Bul tek «Kásipkerlikti qoldaý kartasy» aıasynda júzege asqan jobalar. Jyl sońyna deıin, bıznes ókilderiniń ashqan zaýyttaryndaǵy turaqty jumys oryndarynyń sany 2 myńǵa jetedi dep kútilýde. İske qosylǵan kásiporyndardyń basym bóligi qandaı taýar óndiredi? Jergilikti bıliktiń qoldaýy qanshalyqty septigin tıgizýde?

İske qosylǵanyna nebári bir aı ǵana bolǵan bul zaýytta qazir 8 túrli shujyq ónimi shyǵarylady. Quramyndaǵy qajetti shıkizat – tolyǵymen otandyq taýar. Kúnine kem degende 100 keli ónim daıyndalady. Bolashaqta tushpara, mánti, et qosylǵan varenıkter sekildi 30-ǵa jýyq as jasalmaq. Óndiris ornynyń salynýy men iske qosylýy – Úkimet bólgen sýbsıdıanyń, jergilikti bıliktiń ákimshilik kedergilerdi boldyrmaý úshin kórsetken qolǵabysynyń arqasy deıdi bıznesmen.

«Memlekettiń qoldaýy bolmaǵanda, men bul óndiris ornyn iske qosa almaıtyn edim. «Damý» kásipkerlikti qoldaý qory arqyly 35 mıllıon teńge nesıe aldyq. Onyń paıyzdyq mólsherlemesiniń teń jartysy sýbsıdıa arqyly óteledi. Bul bizge úlken qoldaý. Sondaı-aq, «Kásipkerlikti qoldaý kartasy» aıasynda zaýytty salýda, ınfraqurylymdy júrgizýde qujattyq kedergiler kezdespedi. Qazir on shaqty adam jumys isteýde. Aldaǵy ýaqytta kásiporynǵa 30 shaqty mamandy tartamyz dep josparlap otyrmyz», – dedi kásiporynnyń bas dırektory Qaırat Jumanov.

Júzege asyp jatqan jobalardyń basym bóligi tamaq, mashına jasaý, agrónerkásiptik keshen, qurylys ındıstrıasy, farmasevtıka, jeńil ónerkásip, metal men aǵash óńdeý jáne hımıa ónerkásibi salasy. «Kásipkerlikti qoldaý kartasy» sheńberinde osy jyldyń ekinshi toqsanynda kásiporyndar 48 mıllıard teńgeniń taýaryn óndirgen. Al odan qazynaǵa 3 mıllıard teńgege jýyq salyq túsipti.

«Búgingi kúni ındýstrıaldy-ınnnovasıalyq damý baǵdarlamasy sheńberinde, kásipkerlikti qoldaý kartasy boıynsha 109 joba iske asyrylýda. Onyń 47 jobasy búgingi kúni iske qosyldy. «Kásipkerlikti qoldaý kartasy» sheńberinde júzege asyrylǵan kásiporyndar qazirgi kúni Almaty qalasynda júrgizilip jatqan jóndeý jumystary, basqa da memlekettik satyp alýlar sıaqty jumystardyń aldyńǵy leginde qarastyrylady», – dedi Almaty qalasy Kásipkerlik jáne ındýstrıaldy-ınnovasıalyq damý basqarmasynyń bas mamany Darqan Saǵynbekov.

Jyl sońyna deıin 65 mıllıard teńgeni quraıtyn 21 joba iske qosylady dep josparlanǵan. Onyń ishinde, 1 mıllıard teńgeni quraıtyn 5 kásiporyn óz jumysyn bastap ketti. Onda búginde 90-ǵa jýyq adam eńbek etýde. İske asyrylý satysynda 16 joba bar. Aldaǵy ýaqytta 2 myńǵa jýyq adam «eki qolǵa bir kúrek» tabady degen sóz.