QR UQK Shekara qyzmetiniń Akademıasy janynan zańsyz taýarlardy ótkizbeýge daıarlaıtyn oqý alańy ashyldy. Jobaǵa Qazaqstandaǵy AQSH dıplomatıalyq ókildigi qoldaý kórsetip otyr.
Jańa oqý ornynda úsh júk kóligin qatar tekseretin garaj, bes vagondyq temirjol perrony, jáne de ushaqtyń oqý salony bar. Munda bolashaq shekarashylar tıym salynǵan taýarlardy tasymaldaý men quqyq buzýshylardy quryqtaý tásilin meńgeredi. Shekara qyzmetiniń Akademıasy tájirıbelik aýmaǵynda bilim alýshylar jappaı joıý qarýlaryn jasaıtyn materıaldy anyqtaý ádisterin úırenedi. Oqý ortalyǵynda qazaqstandyq kýrsanttar men qosa Qyrǵyzstan, Tájikstan jáne Aýǵanstan shekarashylary qylmysty tusaý joldaryna mashyqtanady.
«Akademıanyń jańa oqý bazasynda Aýǵanstan men Orta Azıa aýmaǵy shekara áskerleri daıarlyqtan ótedi. Joba AQSH Memlekettik departamentiniń Eksporttyq baqylaý jáne shekara qaýipsizdigi baǵdarlamasy aıasynda júzege asyryldy. Alańda «Boeing 777» avıasıalyq áýe kemesiniń sımýlátory ornalasqan. Bul álemdegi eń úlken jattyǵý qurylǵysy. Áýe kemesiniń ústińgi jaǵy men tehnıkalyq bólikterin, ushqyshtar kabınasy, ekıpajdyń demalatyn ornyn tekserýge jaǵdaı jasalǵan. Sondaı-aq temirjol perrony men shekara arqyly tasymaldanǵan júkterdi muqıat tekserýge arnalǵan transporttyq quraldar bar. Akademıada oqý-jattyǵý barysy 4 jylǵa sozylady. Oqý ornynda jolaýshylardy esirtki ónimderinen, psıhotroptyq zattardan, qarý-jaraqtardan tekserý úshin tájirıbelik sabaqtar ótkiziledi. Bul aýmaq Qazaqstan jáne Ortalyq Azıa shekara -keden baqylaý mamandarynyń paıdasyna beriledi», -dedi QR UKQ Shekara qyzmeti Akademıasynyń basshysy Pavel Palıvanov.
Onyń aıtýynsha, mundaı sımýlátordyń álemde 22 túri bar. Al kólemi jaǵynan eń úlkeni bolyp sanalatyn, ólshemi 22 metrge jetetini osy. Shekara qyzmetiniń Akademıasy áskerıleri jattyǵý alańyn 1 qyrkúıekten paıdalana bastaıdy. AQSH elshiligi arnaıy jobaǵa 2 mln 200 myń AQSH dollaryn bólgen.
