Almatyda «Nur Otan» partıa fılıalynyń baspasóz ortalyǵynda mamandar Almatyda qalaı páter alýǵa bolatyny jóninde aıtty.

«Aldyńǵy jyldarmen salystyrǵanda búgin qazaqstandyqtarǵa  baspanaly bolýǵa  birneshe múmkindik bar. «Nurly jer» jáne «Almaty jastary» sekildi aýqymdy baǵdarlamalar júzege asyrylýda. 7-20-25 baǵdarlamasynyń iske asyrylýy bul turǵyda úlken serpin beredi»,- dedi «Nur Otan»  partıasy Almaty qalalyq fılıaly tóraǵasynyń orynbasary Stanıslav Kankýrov. 

Mamandar baspanaly bolýdyń tıimdi joldaryna toqtala ketti.

Sharaǵa qatysqan «Turǵyn úı qurylys jınaq banki» AQ tóraıymy Lázzat Ibragımovanyń aıtýynsha, qazirgi tańda jınaqtaý júıesi boıynsha «Almaty jastary» baǵdarlamasy, «Nurly jer», «Óz úıim» baǵdarlamasy boıynsha baspana alýǵa bolady. Alaıda, banktiń qoıatyn birqatar sharty bar.

«Almaty jastary» boıynsha klıenttiń (otbasy bolsa, ekeýiniń de) jasy 35-ke tolmaýy kerek. Ári Almatyda turǵylyqty mekenjaıǵa 1 jyl tirkeýde bolýy tıis. Al «Nurly jer» baǵdarlamasy boıynsha klıenttiń 3 jyldyq turǵylyqty mekenjaıy bolýy shart. Sonymen qatar, adamnyń atynda sońǵy 5 jylda baspana tirkelmegen bolýy tıis. «Óz úıim» baǵdarlamasy boıynsha turǵylyqty mekenjaı bolýy shart emes. Paıyzdyq mólsherleme 8,5%-dan 7%-ǵa tústi», - dedi Lázzat Ibragımova.