Almaty sıfrlandyrý boıynsha qalalar arasyndaǵy álemdik reıtıńte 25-orynǵa taban tiredi.
Almaty ákimdiginde búgin qalalyq İİD ókilderi men qoǵamdyq keńes músheleri qalanyń qaýipsizdik máselelerin talqylady.
«Ákimdik qaýipsizdik máselesine kelgende 20-ǵa jýyq keshendi baǵdarlama qabyldaǵan. Ár dúısenbi kúni ákimdik apparatynda departament jetekshilerimen qala turǵyndarynyń aryz-shaǵymy jaıly jıyn ótedi. Taldaý kórsetkendeı, úlken qalada qaýipsizdik máselesi óte ózekti. Sebebi, qalada kóshi-qon kórsetkishi óte joǵary. Qaýipsizdikti qamtamasyz etý maqsatynda qalamyzdy sıfrlandyrýdy belsendi qolǵa alyp jatyrmyz. Búginde Almaty sıfrlandyrý reıtinginde 25-orynda tur», - dedi Baýyrjan Baıbek.
Almaty ákimi aıtqandaı, álemdik standart boıynsha adam 24 saǵat boıy ózin qaýipsiz sezinýi kerek.
«Búginde ákimdik áleýmettik jeli arqyly halyqpen baılanysta otyr. Instagram arqyly ǵana halyqtyń alańdaýly suraqtary 3 kúnde sheshiledi. Sońǵy 3 jylda polısıa qyzmetkerlerin tehnologıalarmen, kólikpen qamtýǵa 30 mlrd teńge bólindi. Buryn qamtý kórsetkishi 66 paıyz bolsa, qazir polısıa 90 paıyzǵa jabdyqtalǵan», - dedi ákim.
Qala basshysy bul kórsetkishti jyl sońyna deıin 100 paıyzǵa jetkizýdi kózdep otyr.
«Búginde vıdeobaqylaýmen jáne GPS quraldarmen 200 kólik jabdyqtalǵan. Osy quraldardyń arqasynda byltyr 241 myń jol erejesin buzý deregi áshkerelendi», - dedi ákim.
