Bıyl Eýrazıalyq mýzyka premıasynda syn sadaǵyna ilikken ánshilerdiń asyǵy alshysynan tústi. «91» boızbendine buryn-sońdy bolmaǵan nomınasıa buıyrsa, Qaırat Nurtastyń inisi «Úzdik oryndaýshy» músinshesin enshiledi. Bul týraly «NTK» arnasyndaǵy «Revú» baǵdarlamasy habarlady.
Osy jyly otandyq juldyzdar EMA premıasyn Elorda tórinde atap ótti. 7-shi márte uıymdastyrylǵan jobada shoý-bıznes ókilderi ádettegideı qyzyl kilemmen júrip ótip, marapattaý rásiminde 15-ten astam nomınasıany ózara bóliske saldy. «Samaıa vyshka» tregi arqyly tanylǵan Artýr men Raıym, «Jyl jańalyǵymen» qatar «Ǵalamtor tańdaýy» syndy nomınasıany jeńip aldy.
Qanjyǵasy qos birdeı júldemen maılaǵan mýzykanttardyń qatarynda – Naıntı ýan ujymy da bar. Atalmysh bestiktiń «Aıama» klıpi sapaly beınebaıandardyń kóshin bastasa, sý jańa nomınasıa «Úzdik kú-pop ártisi» músinshesi de «91» tobyna tabystaldy.
«Kú-pop baǵytyna 3-aq jyl boldy. Birinshi qyrkúıekten bastap 3 jyl bolýy kerek. Jalpy kú-pop baǵyty moıyndalyp, oǵan resmı túrde nomınasıa usynylýy bizdi óte qatty qýantady. Kú-pop baǵytyn shynymen de bar dep biz aıta alamyz», – deıdi «Ninety one» toby.
«Úzdik dýet» nomınasıasy Baıan Alagózova basqaratyn ortalyqqa buıyrdy. Qyzdar ujymyna haıp syılaǵan trek, jeńisti de tartý etti.
Keshúdiń eks-músheleri de júldeden qur qalǵan joq. Názik jandylar arasyndaǵy «Úzdik oryndaýshy» nomınasıasyna, atyshýly ujymnyń altyn quramy laıyq dep tańdalǵan. Alaıda, Janar Duǵalova men Aıdana Medenovany Kámshat Joldybaeva jolda qaldyrdy.
«Men shynymende Janarǵa da, Aıdanaǵa da ishteı jankúıer bolyp otyrdym. Qalaı bolǵanda da, bul úlken jeńis», – dedi Kámshat Joldybaeva.
Qaırat Nurtas – «Úzdik oryndaýshy»! Halyqtyń tańdaýynda top jarǵan hıtmen, bul joly marapatyn inisine tabystady.
«Zańǵarǵa aıtarym, barlyǵy Allanyń qalaýymen. Sondyqtan alǵa basa ber. Tyńdaıtyndardy tyńda, tyńdamaıtyndardy tyńdama!», – dedi Qaırat Nurtas.
