Búgin «Azamattarǵa arnalǵan úkimet» memlekettik korporasıasynda birneshe adamnyń ómirin qutqarǵan erjúrek jigitter Aıdar Mustafın, Dıas Rahmetov jáne Rýslan Qurmanov marapattaldy. Olar qysyltaıań shaqta batyrlyq tanytyp, erlik jasaǵandary úshin aqparat jáne komýnıkasıalar mınıstri Dáýren Abaevtyń alǵys hatyna ıe boldy. Sondaı-aq memlekettik korporasıanyń basqarma tóraǵasy Abylaıhan Ospanov áriptesterine qurmet gramotasy men aqshalaı syılyq tabys etti.
Qostanaı qalasynda 21 tamyzda túnde bolǵan oqıǵadan keıin mamandandyrylǵan halyqqa qyzmet kórsetý ortalyǵynyń qarapaıym operatorlarynyń esimderi kúlli Qazaqstanǵa tanylǵan bolatyn. Sol túni Karbyshev kóshesindegi kópqabatty úı órtke oranyp, alańsyz kele jatqan áriptester oqystan kómekke shaqyrǵan balalardyń daýysyn estıdi. Janaıqaı shyqqan jaqqa júgirgen jigitter órt sóndirý qyzmetiniń kelýin kútpesten, adamdardyń ómirin qutqarýǵa umtylady.
«Men sonshalyqty batyrlyq tanyttym dep oılamaımyn, ózgege kómektesý árkimniń mindeti», - deıdi Aıdar Mustafın. Ol temir torlar arqyly tútinge tolǵan páterdiń terezesine órmelep shyǵyp, tómende turǵan áriptesterine bala men jasóspirimdi tabystaǵan bolatyn. Sosyn tútinge tunshyǵyp jatqan qarıalarǵa kómektesý úshin páterge kirgen. Eki oramaldy sýlap, birin qart kisilerge berse, ekinshisimen tútin kirip jatqan esikti qymtaıdy.
Oqıǵa ornyna jetken órt sóndirýshiler men JQAJ (jyldam qımyldaıtyn arnaıy jasaq) qyzmetkerleri órt shyqqan úıdegi adamdardy syrtqa shyǵarady. Sondaı-aq olar ózgeni qutqarý úshin óz ómirin qaýipke tigip, tútinge ýlana bastaǵan Aıdarǵa da kómek kórsetti.
Aıdar, Dıas jáne Rýslan «Azamattarǵa arnalǵan úkimettiń» Qostanaı qalasyndaǵy Mamandandyrylǵan halyqqa qyzmet kórsetý ortalyǵynda jumys isteıdi. Olar kúndelikti qyzmet barysynda avtokólik ıelerine anyqtamalyq aqparat berip, azamattardyń qujattaryn rásimdeıdi. Aıdar HQO júıesinde 9 jyldan beri jumys istep, jas mamandarǵa úlgi bop keledi. Endi ol tek eńbekte ǵana emes, ómirde de ózgege ónege bolýda.
Aıta ketsek, qazirgi tańda memlekettik korporasıanyń front-ofısterinde 8 myńnan astam adam jumys isteıdi. HQO operatorlary aptasyna alty kún saǵat 9.00-den 20.00-ge deıin úzilissiz qyzmet kórsetedi. Front-ofıster arqyly aı saıyn shamamen 3 mıllıonǵa tarta memlekettik qyzmet usynylady.
