Memleket basshysy Qazaqstanǵa kelip, Konstıtýsıa kúnin birge merekelegeni úshin jıynǵa qatysýshylarǵa rızashylyq bildirdi, sondaı-aq kóptegen halyqaralyq sarapshylar qatysqan bul konferensıa quqyqtyq memleket qurý jóninde ilim-bilim almasýǵa zor múmkindik bergenin atap ótti.

– Biz konstıtýsıalyq qurylym isindegi yntymaqtastyq pen ózara tájirıbe almasý múmkindigin joǵary baǵalaımyz. Qundy keńester men usynymdar úshin rızashylyq bildiremiz, – dedi Qazaqstan Prezıdenti.

Elbasy táýelsizdik alǵan sátten bastap Qazaqstandaǵy konstıtýsıonalızmniń damý tarıhyna toqtaldy.

– 1995 jylǵy kóktemde bir top zańger ǵalymdarmen birlesip, bizge qandaı konstıtýsıa qabyldaý qajettigin talqyladyq. Men ózim elimiz úshin qolaıly erejelerdi izdestirý maqsatymen Eýropanyń, Amerıka men Azıanyń 20 eliniń konstıtýsıalaryn jete zerttedim. Sebebi, biz basqa memlekettiń konstıtýsıasyn sol kúıinde kóshirip ala almaımyz. Osylaısha, 1995 jylǵy jeltoqsanda jalpyhalyqtyq referendýmda azamattarymyzdyń basym kópshiligi qoldaǵan konstıtýsıany qabyldadyq. Bul qujat búginde bizdiń ómirimizge arqaý bolyp, memleketimizdi qalyptastyryp, táýelsizdigimizdi nyǵaıtyp otyrǵan negizgi zańǵa aınaldy. Konstıtýsıamyz ýaqyt talabyna saı únemi reformalanyp, jetildirilýde. Máselen, ótken jyldyń basynda men Prezıdenttiń birqatar ókilettikterin Parlament pen Úkimetke olardyń derbestigin ári jaýapkershilik aıasyn keńeıte otyryp qaıta bólý jónindegi konstıtýsıalyq reformaǵa bastamashy boldym, – dedi Nursultan Nazarbaev.

Memleket basshysy Qazaqstannyń Negizgi zańnyń joǵary zańdyq kúshin qamtamasyz etý barysynda quqyq ústemdigin ornyqtyrý saıasatyn maqsatty túrde júrgizip otyrǵanyna toqtalyp, elimizdiń álemdik arenadaǵy jetistikteri onyń halyqaralyq bedelin jáne Konstıtýsıamyzda belgilengen beıbitsúıgish syrtqy saıası qaǵıdattarymyzdyń tıimdiligin kórsetetinin atap ótti.

– Qazaqstannyń jetistikteri halyqaralyq qoǵamdastyq tarapynan moıyndalǵany aıdan anyq. Biz shırek ǵasyr ishinde ekonomıkamyzdy 22 ese ósirip, qazaqstandyqtardyń turmys sapasyn jaqsarttyq. Jurtshylyq ózderiniń dinı saltyn erkin ustanyp, óz ana tilinde sóıleı alatyn, sondaı-aq mádenıetin saqtaıtyn kópultty jáne kópkonfessıaly memleket qurdyq. Bıyl Astanada ótetin Álemdik jáne dástúrli dinder kóshbasshylarynyń VI sezi sonyń dáleli, – dedi Qazaqstan Prezıdenti.

Halyqaralyq sarapshylar Qazaqstanǵa shaqyrǵany úshin Nursultan Nazarbaevqa alǵys bildirip, Konstıtýsıa kúnin merekeleý túrli ınstıtýttar arasyndaǵy qatynastardy retteýdiń berik negizi ári quqyqtar men bostandyqtardy qorǵaýdyń kepili sanalatyn eń mańyzdy qujattyń máni zor ekenin aıǵaqtaıtynyn atap ótti.

– Konstıtýsıa kúnin merekeleý azamattardyń, sonyń ishinde jastardyń arasynda konstıtýsıalyq qundylyqtardy dáriptep, taratýǵa baǵyttalǵan tárbıelik sıpattaǵy órkenıet belgisi sanalady. Sondaı-aq, qoǵamdyq úılesimdilikti, tynyshtyq pen turaqtylyqty júzege asyrý jolyndaǵy umtylystyń baǵyty durys ekenin kórsetedi, – dedi  Aljır Halyq Demokratıalyq Respýblıkasy Konstıtýsıalyq keńesiniń tóraǵasy M.Medelchı.

Sońynda Memleket basshysy konstıtýsıalyq zańdylyqty qamtamasyz etý isindegi negizgi ról quqyq ústemdigin saqtaýdy kózdeıtin konstıtýsıalyq ádilet organdaryna tıesili ekenin aıtty. 

Jıynǵa Qazaqstan Respýblıkasy Konstıtýsıalyq keńesiniń tóraǵasy Q.Mámı, Ázerbaıjan Respýblıkasy Konstıtýsıalyq sotynyń tóraǵasy F.Abdýllaev,  Aljır Halyq Demokratıalyq Respýblıkasy Konstıtýsıalyq keńesiniń tóraǵasy M.Medelchı, Armenıa Konstıtýsıalyq sotynyń tóraǵasy G.Tovmasán, Bolgarıa Konstıtýsıalyq sotynyń tóraǵasy B.Velchev, Latvıa Respýblıkasy Konstıtýsıalyq sotynyń tóraǵasy I.Zıemele, Konstıtýsıalyq ádil sot jónindegi dúnıejúzilik konferensıanyń Bas hatshysy Sh.Dúrr, Eýrazıalyq Ekonomıkalyq Odaq sotynyń tóraǵasy J.Báıishev, Qazaqstan Respýblıkasy Prezıdenti Ákimshiligi basshysynyń orynbasary Á.Raqysheva qatysty.