Túrkistan oblysynyń ákimi Janseıit Túımebaev jumys saparymen Maqtaaral aýdanyna bardy. Óńir basshysy aldymen Iirjar aýyldyq okrýgi Naýryz aýylyndaǵy jańadan salynǵan N.Bekejanov atyndaǵy 200 oryndyq mekteptiń ashylýyna qatysyp, jergilikti jurtty jańa oqý jyly qarsańyndaǵy qýanyshty jańalyqpen quttyqtady.
«Túrkistan óńiri eń kóp halyq tyǵyz ornalasqan aımaq. Týý kórsetkishi de joǵary. Máselen, bıyldyń ózinde oblys boıynsha birinshi synypqa 55 myńnan astam oqýshy keledi. Iaǵnı, mektepke keletin oqýshy sany 19 myńǵa artqan. Demografıalyq ósimge baılanysty 2018-2025 jyldary aralyǵynda óńirde 184 mektep salý qajettiligi týyndap otyr. Bıyl bilim berý salasyna qajetti 83 nysannyń qurylysy qolǵa alynǵan. Onyń 40-y jyl sońyna deıin paıdalanýǵa beriledi. Mine, búgin de Maqtaaral aýdanynda jańa mektep ashylyp, aýyl oqýshylaryna esigin ashady», - dedi Janseıit Qanseıituly.
Keıin oblys ákimi Maqtaaral aýdanyndaǵy Azattyq aýylynda ornalasqan logıstıkalyq ortalyqqa aıaldady. Agrarly aýdanda sharýalardyń ónimin saqtap, ári qaraı satý úshin qolaıly jaǵdaı jasaý maqsatynda qolǵa alynǵan jobaǵa 9 gektar jer telimi qarastyrylǵan. Ortalyqta jańa úlgidegi jemis-jıdek saqtaý jáne ýaqytsha suryptaý qoımalary, muzdatqysh kamera men júk kólikterine arnalǵan turaqjaı, tehnıkalyq qyzmet kórsetý stansasyn salýǵa jalpy quny 1 mıllıard teńgege jýyq ınvestısıa tartý kózdelgen. Aldaǵy ýaqytta avtoparkıng, elektrondy tarazy, júk saqtaý qoımalary, turaqjaı, qujattandyrý ortalyǵy, qonaq úı, asqana, saýda úıi, avto jýý orny salynatyn bolady.
