Aqtóbede lıftide janshylyp ólgen telejúrgizýshi kelinshektiń ólimine baılanysty sot bastaldy. Jaýapqa tartylyp jatqan kooperatıv dırektory men lıftini jóndegen mehanık taǵylǵan aıyppen kelispeı otyr. Jaýapkershilikti birine biri artyp qoımaq. Al qara jamylǵan otbasy ekeýine qatań jaza kesýdi talap etti. Bul týraly KTK arnasy habarlady.
28 jastaǵy telejúrgizýshi Aızat Ábdisamattyń Aqtóbedegi kóp qabatty úıdiń lıftisinde janshylyp kóz jumǵanyna týra bes aı boldy. Sol ýaqyttan beri birneshe tehnıkalyq saraptama taǵaıyndalyp, sot otyrysy da keıinge shegerile berdi. Buǵan aıyptalýshynyń biri — mehanık Jarylqasyn Aqjanovtyń júregine ota jasalýy sebep bolǵan. Ol aýrýhanadan shyqqan boıda proses te bastaldy.
"Lıftini paıdalanýǵa bergen kezde turǵyndardyń qaýipsizdigi úshin eshqandaı shara qoldanbaǵan. Aqaýy bar jedelsatyny iske qosqan. Oǵan taǵaıyndalǵan saraptama qorytyndysy dálel bola alady", — deıdi memlekettik aıyptaýshy Asqat Sársenbaev.
Sotta jaýap berip jatqan kooperatıv dırektory men mehanık birin-biri kinálap otyr. Bastyǵy tehnıkadan habarym joq dep aqtalsa, lıftini jóndeý úshin jaldanǵan maman sútten aq, sýdan tazamyn dep basyn alyp qashady.
"Bul úıdiń lıftisi burynnan tozǵan. Turǵyndardyń ótinishi boıynsha qoldan kelgenshe ońdap júrdik. Sońǵy ret qaıǵyly oqıǵa bolardan tórt kún buryn ǵana Aqjanovqa aqsha berip jóndeýden ótkizgen edik", — deıdi "Jańabekov-servıs" JSHS dırektory Kemel Jańabekov.
Aızat Ábdisamat lıftige qysylyp ólgende janynda kishkentaı qyzy bolǵan. Qazir ol ákesiniń qolynda tárbıelenip jatyr. Marqumnyń kúıeýinen bastap, barlyq týysy qos aıyptalýshyǵa eshqandaı keshirim joq deıdi.
"Eshqandaı da maǵan materıaldyq, moraldyq ótemaqynyń qajeti joq. Meniń balamnyń ólimine kináli adamdar ádil jazalansyn deımin. Qazirgi jaǵdaıda úsh jasar sábı óziniń anasyna "mama" degen sózdi aıta almaıtyn jaǵdaıǵa jetkizdi olar. Sebebi, anasynyń ólimin kórgen sábı anasyn suramaıdy", — dedi marqum Aızat Ábdisamattyń anasy Aısha Tólemisova.
Aızattyń ólimine sebepshi bolǵan lıft bes aıdan beri istemeıdi. Oǵan sol kúıi jóndeý de júrgizilmegen. Aqtóbede osy qaıǵyly oqıǵadan soń toqtap turǵan jalǵyz jedelsaty bul emes. Óıtkeni jappaı tekserýden keıin eskirgenderiniń báriniń esigin jaýyp tastaǵan edi. Al jańartýǵa turǵyndardyń da, ákimdiktiń de aqshasy joq.
