5 qyrkúıekte Almaty qalasynda Habar arnasynyń tapsyrysy boıynsha túsirilgen «Taǵy da súı» teleserıalynyń aldyn ala kórsetilimi ótti dep jazady Qamshy.kz aqparat agenttigi.   Atalǵan sharaǵa jas akterlarmen qatar blogerler, óner ıeleri qatysty. Bul kınokartınanyń rejıseri osyǵan deıin «Qarıa» týyndysyn halyqqa usynǵan Asqat Musabaı.

«Teleserıaldaǵy basty keıipker 2 jyl boıy ǵashyǵyn umyta almaı júrgen kezde taǵy da bir qyzdy unatyp qalady. Qazirgi jastar túriktiń, káristiń serıaldaryn kórgendi jaqsy kóredi. Sol serıaldardyń farmatyna jaqyndaý, biraq ózimizdiń qazaqı naqyshymyzǵa keltirip túsirýge tyrystyq. Jastardyń kóńilinen shyǵady dep oılaımyz. Túsirilim jalpy 40 kúnge sozyldy. Al kastıng 2 aıǵa sozyldy, akterler Qazaqstannyń túrli óńirinen jınaldy. Basty róldegi Nursiýle Áýbákirova Astana qalasynan kelse, basty róldegi Shalqar Qudaıbergen Almaty qalasynyń týmasy. Teleserıalda belgili akterlardyń qatarynda Ádiljan Shonbanov, Aızada Satybaldıeva, Zarına Omarova, Bolat Ábdilmanov bar. Teleserıal 12 bólimnen turady. Habar arnasynan 10 qyrkúıekten bastap kóre alasyzdar», deıdi teleserıaldyń rejıseri Asqat Musabaı.

Atalmysh sharada teleserıaldyń alǵashqy 3 bólimniń qysqartylǵan nusqasy kórsetildi. Teleserıaldaǵy basty keıipker Aıan symbatty, bilimdi jigit. Al onyń ákesi jarnama agenttiginiń basshysy, anasy florıst. Aıannyń súıgen qyzy Asyl 2 jyl buryn jol apatynan qaıtys bolyp, basty keıipker kúızeliske ushyraıdy. Ýaqyt óte kele ol Asyldy umytqandaı bolady. Keıin Mereı esimdi óziniń qyzmetkerine ǵashyq bolyp, onymen bas qosady. Alaıda Aıan Asyldy qaıta jolyqtyryp, oqıǵa shıelenise túsedi. 

«Habar Agenttigi» AQ Basqarma Tóraǵasynyń orynbasary Rınat Dýmanuly Kertaevtyń aıtýy boıynsha, bul teleserıal otbasymen birge qysylmaı otyryp kórýge arnalǵan. Qazirgi otandyq teleserıaldar men fılmderdiń kópshiligi zamannyń aǵymyna erip, qazaqtyń tabıǵatyna jat turǵyda túsirilip jatqanda otbasymen birge otyryp qysylmaı kórýge bolatyn teleserıaldyń kóbeıýi qýantarlyq jaıt. «Taǵy da súı» teleserıaly koreıalyq serıaldardyń qazaqsha nusqasy dep ataýǵa da bolady. Sebebi ázil aralas jastarǵa arnalǵan jeńil teleserıal.

"Taǵy da súı" teleserıalyn «Habar» telearnasynan 10 qyrkúıekten bastap dúısenbi-beısenbi aralyǵynda saǵat 22:20-da kóre alasyzdar.