Aqtóbe feroqorytpa zaýyty — hımıalyq tásildermen sapaly, asa berik shoıyn óndirýge qajetti ferroqospalar shyǵarýǵa mamandandyrylǵan metalýrgıalyq kásiporyn. Munda elimiz boıynsha tuńǵysh ret metal hrom men kómirteginsiz ferrohrom óndirisiniń tehnologıasy ıgerilgen bolatyn. Aqtóbe feroqorytpa zaýytynyń 75 jyldyq toıynda zaýyttyń birqatar qyzmetkerleri baspanaly boldy.
Batys-2 shaǵyn aýdanynda salynǵan 90 páterlik jańa úı kásiporynnyń jas jáne bilikti mamandaryna buıyrdy. Saltanatty sharaǵa oblys ákimi Berdibek Saparbaev, Eýrazıalyq Toptyń basqarma tóraǵasy Serik Shahajanov, «Qazhrom» transulttyq kompanıasy» aksıonerlik qoǵamynyń prezıdenti Arman Esenjolov qatysyp, qonystoı ıelerin quttyqtady. — Ár adam úshin baspananyń bolýy asa mańyzdy. Memleket basshysy Nursultan Nazarbaevtyń saıasatynyń negizgi baǵyty da osy— Qazaqstan turǵyndarynyń turmys-tirshiliginiń jaqsy bolýy, baspanamen qamtamasyz etilýi. Osy baǵytta elimizde «Nurly jol», «Nurly jer» sekildi birneshe baǵdarlama júzege asyrylyp jatyr. ERG kompanıasy tarapynan 15 jylda óz qyzmetkerlerine arnap 12 úı berildi. Sońǵy eki aptanyń ishinde Aqtóbe oblysynyń ózinde ekinshi úı berilip otyr. Onyń biri 4 shilde kúni Hromtaý qalasyndaǵy Dóń taý-ken baıytý kombınatynyń jumysshylaryna berilse, ekinshisi, mine, Aqtóbe feroqorytpa zaýytynyń 75 jyldyǵy qarsańynda atalǵan zaýyt jumysshylaryna berilip otyr. Aqtóbe feroqorytpa zaýytynyń oblys ekonomıkasynyń damýynda mańyzy zor. Kásiporyn óz kadrlaryna barynsha jaǵdaı jasap otyr, bul kásibı bilikti mamandardyń basqa óndiristerge ketip qalmaýyna, turaqty jumys isteýine, erteńine senimmen qaraýyna septigin tıgizedi, — dedi oblys ákimi B.Saparbaev. Jańa turǵyn úıdegi bir sharshy metrdiń quny shamamen 110 myń teńge. Eýrazıalyq toptyń turǵyn úı baǵdarlamasy boıynsha páterlerdi 20 jylǵa deıin tómen paıyzdyq mólsherlememen satyp alý quqyǵymen jalǵa berý qarastyrylǵan. Bul is-shara Elbasynyń «Nurly jer» baǵdarlamasy aıasynda Qazaqstan ıpotekalyq kompanıamen aradaǵy kelisimge sáıkes júzege asyryldy. Turǵyn úıdi rásimdeý «2020 jylǵa deıingi Óńirlerdi damytý memlekettik baǵdarlamasy» boıynsha júrgiziledi. Saltanatty mereke barysynda metalýrgterdi Eýrazıalyq Toptyń basqarma tóraǵasy Serik Shahajanov, «Qazhrom» transulttyq kompanıasy» aksıonerlik qoǵamynyń prezıdenti Arman Esenjolovtar da quttyqtady.
Aıta ketý kerek, bul Aqtóbe qalasynda feroqorytpa zaýytynyń jumysshylary men basqarma apparatyna Eýrazıalyq toptyń turǵyn úı baǵdarlamasyn iske asyrý sheńberinde berilip otyrǵan úshinshi úı. 2006 jyldan bastap atalǵan baǵdarlama aıasynda Aqtóbe qalasynda Aqtóbe feroqorytpa zaýyty men «Qazhrom» transulttyq kompanıasy» aksıonerlik qoǵamynyń 264 jumysshysy baspanaly boldy.
Budan soń Aqtóbe oblysynyń ákimi Berdibek Saparbaev, Eýrazıalyq Top pen «Qazhrom» basshylyǵy Tuńǵysh Prezıdent atyndaǵy saıabaqta ótkizilgen merekelik is-sharaǵa qatysty. Bul saltanatty sharaǵa kásiporynnyń burynǵy dırektorlary, zaýyt ardagerleri men jumysshylary shaqyrylǵan.
