Aqtóbe oblysy – elimizdegi ónerkásip salasyndaǵy irgeli óńirleriniń biri. Oblysta kásipkerlikti damytý maqsatyndaǵy jumystar júıeli júrgizilip keledi. Jýyrda «Qazaqstannyń úzdik taýary» kórme-baıqaýynyń óńirlik kezeńiniń jeńimpazdary anyqtaldy. Baıqaýǵa óńirdegi qyryqqa jýyq jetekshi kásiporyndar qatysqan bolatyn.
— Memleket basshysynyń alǵa qoıǵan basty mindetterdiń biri — álemniń damyǵan otyz eliniń qataryna tezirek ený. Al bul maqsatqa jetý úshin ekonomıkanyń óndiristik sektoryn keńinen damytý qajet. Prezıdenttiń tapsyrmalaryna sáıkes «Qazaqstannyń úzdik taýary» óńirlik jáne respýblıkalyq kórme-baıqaýy elimizde 13-ret ótip jatyr. Bul — qolda bar áleýetti kórsetip qana qoımaı, kásiporyn shyǵaratyn ónim sapasyn únemi arttyryp otyrýǵa, halyqaralyq standarttardy engizýge jeteleıtin tamasha dástúr, — dedi oblys ákimi Berdibek Saparbaev.
Óńir basshysy mundaı jarystarǵa qatysý taýar óndirýshilerdiń iskerlik baǵyttaǵy seriktestigin odan ári damytýǵa keń jol ashatynyn atap ótti. Osy maqsatta Aqtóbe oblysynda shaǵyn jáne orta bıznes sýbektilerine, ıaǵnı satyp alý prosedýrasynyń áleýetti qatysýshylary úshin iri kásiporyndardyń Ashyq esik kúnderi ótkizilýde. Osyǵan uqsas sharalar «Qazhrom» TUK» AQ, «SNPS – Aqtóbemunaıgaz» JSHS, «Aqtóbe mys kompanıasy» JSHS mekemelerinde uıymdastyryldy.
— Bizdiń basty maqsatymyz — kásipkerlikti damytý úshin barynsha kedergisiz orta jasaý. Búginde bizdiń óndiristegi kórsetkishterimiz jaman emes. Ótken jyldyń qorytyndysy boıynsha ónerkásiptik óndiris kólemi aqshaǵa shaqqanda 1,6 trıllıon teńgege jetti. Bıylǵy birinshi jartyjyldyqtyń qorytyndysy boıynsha 870 mıllıard teńgege ónim óndirilgen, bul byltyrǵy jyldyń osyǵan uqsas kezeńimen salystyrǵanda 5%-ǵa kóbirek, — dep atap ótti Berdibek Saparbaev.
Sarapshy komısıa baıqaý jeńimpazdaryn úsh atalym boıynsha jarıalady. «Óndiristik baǵyttaǵy úzdik taýarlar» atalymynda «Aqtóbe órtke qarsy jabdyqtar zaýyty» birinshi oryndy ıelendi. «Aqtóbe órtke qarsy jabdyqtar zaýyty» — órt sóndirýdiń bastapqy quraldaryn sapaly ári zamanaýı etip shyǵaratyn mamandandyrylǵan jeli. Zaýyt ónimi memlekettik standarttardyń barlyq talaptaryna saı keledi, QR Tótenshe jaǵdaılar mınıstrliginiń Ǵylymı zertteý ınstıtýtynyń akredıtasıasynan ótken. Bul atalymnyń ekinshi jáne úshinshi oryndary «PO Global-Spesodejda» JSHS men «Aqtóbe rels-arqalyq zaýyty» JSHS-na buıyrdy.
«Halyqqa arnalǵan úzdik taýarlar» atalymynyń kóshbasyndaǵy úshtigine bólmearalyq esikter shyǵaratyn «West Line doors» JSHS, turmystyq qaǵaz ónimin óndiretin «Qaz Qaǵaz» JSHS men «Aqsý» jıhaz fabrıkasy endi. «Úzdik azyq-túlik taýarlary» atalymynda birinshi oryn tańqýraı ósirýmen aınalysatyn «Bolat LTD» JSHS-na berildi, ekinshi
jáne úshinshi oryndarǵa unnyń barlyq surpyn, makaron ónimderin, jarma, nan-toqash jáne kondıter ónimderin, taýyq jumyrtqasyn óndiretin «Aqtóbe et klasteri» JSHS men «Ramazan» JSHS ıe boldy.
Óńirlik kezeńniń jeńimpazdary «Qazaqstannyń úzdik taýary» respýblıkalyq baıqaýynda Aqtóbe oblysyn tanystyrmaqshy.
