Aqtóbelik ónimderi elimiz boıynsha keń suranysqa ıe. Aıta ketsek, Elordaǵa aıyna 15-20 tonna sút ónimderin ótkizip otyrǵan Aqtóbede on shaqty fırma bar. Atalmysh kásiporyndar taýarlaryn halyqaralyq bólshek saýda talaptaryna sáıkes óndirýge kóshti.
Aqtóbede óndiriletin ónimder elordamyz Astana qalasynyń saýda oryndaryna jıi jóneltiledi. Aqtóbe oblystyq kásipkerlik basqarmasynyń basshysy Anar Darjanovanyń aıtýynsha, búgingi kúni tamaq ónerkásibi salasynda aqtóbelik on shaqty kompanıa óz ónimderin halyqaralyq bólshek saýda talaptaryna saı etip shyǵaryp otyr. Basqarma basshysy osyndaı kompanıalardyń ishinde Hromtaý aýdanyndaǵy «Agrofırma Taý» JSHS jumysyn erekshe atady. Atalǵan kompanıanyń ózgelerge qaraǵanda mańyzdylyǵy nede degen saýal qoıǵanymyzda ol: «Qazir bul kompanıa aýdandardaǵy shaǵyn qojalyqtardan sút qabyldaýda. Muny óte úlken is dep baǵalaýymyz kerek. Sebebi, birinshi kezekte sútti ótkizip otyrǵan shaǵyn qojalyqtardyń jumysyna qolaıly jaǵdaı týǵyzyp otyr. Ekinshiden, kompanıanyń ózine de bul tásil óte tıimdi. Búgingi kúni bul kompanıa taýardy tek Astana, Shymkent qalalaryna ǵana emes, Batys Qazaqstan, Qostanaı, Qyzylorda sekildi oblystarǵa da jetkizip jatyr. Ózge aımaqtardan da osy kompanıanyń ónimine degen suranys joǵary. Kompanıanyń el aımaqtaryna óz taýarlaryn ótkizýdiń taǵy bir sebebi — ónimniń dámdiliginde. Osylaısha kásiporyn naryqta utyp otyr. Sebebi, «Agrofırma Taý» seriktestigi óndirgen ónimderdiń quramyna qurǵaq sút qosylmaıdy.
Búgingi kúni «Agrofırma Taý» seriktestiginde sút ónimderiniń 25-ten asa túri óndiriledi. Kásiporyn bazasy Hromtaý aýdanynyń terıtorıasynda ornalasqan. Aýdandaǵy sút zaýyty óz jumysyn 2015 jyly qyrkúıekte bastady. Zaýytta kúnine 15 tonna ónim óndiriledi. Seriktestikte 70-ten asa adam turaqty jumyspen qamtylǵan. Onyń kópshiligi — jergilikti turǵyndar.
Bir aıda Astana qalasyna 15-20 tonna kóleminde sút ónimderi jetkiziledi eken. Ásirese, astanalyq tutynýshylar kásiporynnyń maılylyǵy 20 paıyzdyq qaımaqqa jıi tapsyrys berýde. Mundaǵy sút ónimderi refrıjeratorlarmen jáne arnaıy muzdatqyshy bar fýralarmen ózge óńirlerge jetkizilýde.
— Sondaı-aq Aqtóbedegi «Roks» kompanıasynyń shyǵaratyn ónimi joǵary sapaǵa ári suranysqa ıe. Búgingi kúni «Roks» óndiretin ónimderdi astanalyqtardyń tutynyp jatqanyna birneshe jyldyń júzi boldy.
Astana — úlken megapolıs. Bul — óz ónimi ótimdi, naryqqa saı keletin kompanıalar úshin úlken múmkindik týǵyzatyn shahar. Búginde «Agrofırma Taý», «Aıs», «Jańa Áljan» sekildi Aqtóbedegi ózge de kompanıalar óz ónimderin Astana, Almaty qalalaryna ótkizip otyr. Sebebi Eýropa qaıta qurý jáne damý bankiniń kómegimen mundaı kásiporyndar ónimdi zaman talabyna saı etip shyǵardy,- deıdi basqarma basshysy.
