Aqtóbe qalasynda bir aptalyq «Plein Air Aktobe» halyqaralyq keskindeme sımpozıýmy ótti. Onda Bashqurtstan, Ózbekstan, Tatarstan, Reseı Federasıasynyń Perm, Orsk, Tambov qalalarymen qatar elimizdiń ózge de óńirlerinen kelgen qylqalam sheberleri bas qosty.

Aqtóbe oblystyq mádenıet, arhıvter jáne qujattama basqarmasynyń qoldaýymen «Rýhanı jańǵyrý» baǵdarlamasy aıasynda uıymdastyrylǵan kórmege 20-dan astam sýretshiniń qatysty.Keskindeme janryna, qalalyq peızajdarǵa qyzyǵýshylyqty qalyptastyrý, oblystyq óner mýzeıi qoryn sımpozıým qatysýshylarynyń týyndylarymen tolyqtyrý maqsatynda uıymdastyrylǵan sharaǵa qatysty.

Oblystyq óner mýzeıiniń ǵylymı qyzmetkeri İńkár Álibekovanyń aıtýynsha, bul Aqtóbe qalasynda osymen úshinshi ret ótkizilip jatqan halyqaralyq sımpozıým.

— Buǵan deıin oblystyq óner mýzeıiniń uıymdastyrýymen halyqaralyq sımpozıým 2011 jáne 2015 jyldary ótken bolatyn. Bul joly Astananyń 20 jyldyq mereıtoıyna oraı elimizdiń mádenıeti men óneriniń damýyna úles qosý, ózge elder arasyndaǵy shyǵarmashylyq yntymaqtastyqty damytý turǵysynda ótip jatqan sımpozıýmnyń kez kelgen qylqalam sheberi úshin mańyzy zor, — deıdi İ.Álibekova.

Bir aptaǵa jalǵasqan shara barysynda sýretshiler túrli sheberlik saǵattaryn ótkizip, Aqtóbeniń kórikti tustaryn aralady. Sýretshilerge qoıylǵan basty talap — Astana men Aqtóbeniń kórikti jerleri beınelengen eki kartınadan usyný.

Sımpozıým qorytyndysy Óner ortalyǵyndaǵy kartınalar kórmesimen aıaqtaldy. Bul jerde barlyq qatysýshylardy oblystyq mádenıet, arhıvter jáne qujattama basqarmasynyń basshysy Marjan Qorǵanbaeva quttyqtap, Alǵys hattar men estelik syılyqtar tabys etti.

Kórmege qoıylǵan jumystardyń sheberliginen kóz súrinedi. Ónersúıer qaýymnyń nazaryna usynylǵan ekspozısıalardan Aqtóbe men Astananyń tabıǵat sýretteri beınelengen peızajdardy, qos qalanyń kórikti ǵımarattaryn, sondaı-aq ózara úılesim tapqan kompozısıalardy da kórýge bolady. Barlyǵyna usynylǵan taqyryp bir bolǵanymen, kórmege qoıylǵan jumystar ózindik ereksheligimen san alýan.

Jastaıynan qylqalamdy janyna serik etken Bashqurtstan Respýblıkasynyń eńbek sińirgen sýretshisi, Tatarstan Respýblıkasynyń eńbek sińirgen qaıratkeri Vakıl Shaıhetdınov sharanyń basty ereksheligi realısik baǵytta ótkendigin aıtty.

— Kóptegen shetelderde bolyp, túrli sımpozıýmdarǵa qatysyp júrgenimmen, men úshin bul jolǵy sapardyń áseri erekshe boldy. Ulan-ǵaıyr qazaq dalasynyń keńdigin kórip, bir demalyp qaldym. Darhandyqty baıqadym. Sondaı-aq bul joly biz júregimiz qalaǵan jerde kórgenimizdi saldyq. Kózben kórip salǵan dúnıe múlde bólek. Ol adamdy erekshe elite túsedi. Buǵan deıingi sımpozıýmdarda tek sheberhanalarda ǵana jumys

jasaıtynbyz. Al naǵyz óner ıesine bul tarshylyq etedi, — deıdi Vahıl Shaıhetdınov.

Jazǵan jumystarynan sulýlyq ta, náziktik te, batyldyq ta baıqalatyn Vakıl Shaıhetdınov Aqtóbeniń kórikti jerlerinen «Nur Ǵasyr» meshitin beınelegen. Qarap qalǵanda qalanyń ortalyǵynda ornalasqan meshittiń sýretin beınelegen sheber bir kartınasyna birneshe úılesim men maǵyna syıdyrypty.

Meshittiń joǵary jaǵynda aqtóbelikterdiń súıikti oryndarynyń biri Birlik pen kelisim sýly-jasyl gúlzarynda ornalasqan «Shańyraq» beınelengen. Dostyq pen birliktiń tańbasyna aınalǵan Shańyraq kartınanyń da ajaryn ashyp tur. Rýhanı jańǵyrýymyzdyń sımvolyna aınalǵan qyran beınesi de biliner-bilinbes kartınanyń joǵary tusynan oryn alypty. Qazaqtyń bar bolmysyn ádemi bir kartınaǵa syıdyrǵan sýretshi atalǵan jumysty 2 kún salǵan. «Eger barlyq quraldar daıyn bolsa, bir kúnde salyp bitirýge de bolatyn edi», — deıdi ol.

— Ónerde shekara joq degen ras eken. Búgin meniń shyǵarmashylyq qorjynym taǵy bir erekshe jumystarmen tolyqty. Men úshin bul sımpozıýmnyń paıdasy zor boldy. Aldaǵy ýaqytta talaıdy tamsandyratyn kartınalar jasaıtyn dúnıeler jınadym. Aqtóbede birinshi ret bolýym. Óte ásem qala. Endigi maqsatym — el aýzynda júrgen Astana qalasyna barý, — deıdi sýretshi.

Aıta keteıik, kórmege qoıylǵan barlyq kartınalar oblystyq óner mýzeıiniń qoryna tapsyrylady.