Aqtóbe oblysynyń Hromtaý aýdanynda jańa mektep boı kóterip, 120 otbasy qonystoıyn toılady.
Oblys ákimi Berdibek Saparbaev bastaǵan top aldymen Hromtaý aýdanynyń Dóń aýylyndaǵy jańa mekteptiń ashylý saltanatyna qatysty. 600 balaǵa shaqtalǵan jobanyń quny — 1,4 mıllıard teńge.
— Ár ulttyń, memlekettiń damýy onyń bilimdi, densaýlyǵy myqty azamattarymen tikeleı baılanysty. Sondyqtan Qazaqstan Táýelsizdik alǵan kúnnen bastap óziniń bolashaǵy úshin bilim, mádenıet, densaýlyq saqtaý salalaryna erekshe kóńil bólip keledi. Osy 27 jylda Elbasy Nursultan Nazarbaevtyń eń negizgi ustanǵan saıasaty — elimizdi tezirek damyǵan 30 eldiń qataryna qosý. Memleket basshysynyń tapsyrmasyn oryndaý maqsatynda jer-jerde jańa mektepter salynyp jatyr. Aıtalyq, byltyr 14 mektep salyndy. Al bıyl 26 mekteptiń qurylysy júrip jatyr. Mine, Astananyń 20 jyldyǵy qarsańynda 600 balaǵa arnalǵan mekteptiń ashylý saltanatyna qatysyp otyrmyz. Osynyń barlyǵy balalardyń erteń óz qatarynan kem bolmaı, qazirgi zaman talabyna saı bilim alýy úshin jasalyp otyr. Onyń ústine, Dóń taý-ken baıytý kombınatynyń 80 jyldyǵynda osyndaı mekteptiń ashylyp jatqandyǵy eki ese qýantady. Oblys basshylyǵy atynan qurylys kompanıasyna alǵysymdy bildire otyryp, ózderińizge amandyq tileımin. Memlekettiń dańqy arta bersin! — dep jyly lebizin bildirdi Berdibek Mashbekuly.
Eki oqý bóliminen turatyn úsh qabatty ǵımaratta bilim alýǵa qajettiniń bári bar: barlyq kabınetter ǵalamtorǵa qosylǵan, 2 sportzal men mýltımedıalyq bólimmen jabdyqtalǵan. Al aýlada balalardyń fýtbol, basketbol, tenıs oınaýyna jaǵdaı jasalypty. Sý jańa oqý oshaǵynyń ashylýynda ardager ustazdar sóz sóılep, oqýshylarǵa óz batasyn berdi.
Odan soń aýdan ortalyǵynda Dóń taý-ken baıytý kombınatynyń jumysshylaryna arnalǵan 120 páterlik turǵyn úı saltanatty jaǵdaıda paıdalanýǵa berildi. Bes qabatty úı memlekettik «Nurly jer» baǵdarlamasy aıasynda salyndy. Sharada sóz alǵan oblys basshysy zaýyt qyzmetkerlerin qonystoıymen quttyqtap, eńbek adamdarynyń áleýmettik jaǵdaıyn oılaǵan kásiporyn basshylyǵyna alǵysyn aıtty. Al Eýrazıalyq toptyń menedjerler keńesiniń tóraǵasy Aleksandr Mashkevıch:
— Hromtaýǵa men alǵash ret osydan 24 jyl buryn kelgen bolatynmyn. Jaratqannyń qoldaýy men Elbasynyń qamqorlyǵynyń arqasynda osy aralyqta ólkede úlken ońdy ózgerister oryn aldy. Sonyń bárin oı eleginen ótkizseń, 100 jylda jasalǵan jumystar ma dep qalasyń. Qalanyń turmysy jaqsara tústi. Búgin kezekti jańa úıimizdi tapsyryp, 120 otbasyn qýanyshqa bólep jatqanymyzǵa baqyttymyz. Bunyń shyn máninde mańyzy zor. Óıtkeni jas otbasy, jalpy adam úshin baspana máselesi erekshe rólge ıe. Sondyqtan búgin úıli bolǵandar aldaǵy ýaqytta budan da jaqsy jumys isteıtinine senimim kámil, — dedi.
Óndiris ornyndaǵy jas maman Rýstam Áljanov — osyndaı qurmetke ıe bolǵandardyń biri. 23 jastaǵy jigit qýanyshymen tómendegideı bólisti. - Osy qyzmetke turý úshin Aqtóbe qalasynan Hromtaýǵa kóship keldim. Basynda páter jaldap turdym. Endi qyzmettik páterge ıe bolyp jatqan jaıym bar. Talap boıynsha tek komýnaldyq tólemderdi óteımin. Menińshe, osynyń ózi jastarǵa jasalǵan úlken demeý,- deıdi ol.
