«Báıterek» holdıńiniń enshiles uıymy Aqtóbe qalasyndaǵy Turǵyn úı qurylys jınaq bankiniń 2327 salymshysy bıyl qonystoıyn toılaıdy. Jyl basynan beri 800 turǵynǵa «Nurly jer» baǵdarlamasy negizinde baspana buıyrǵan.
Aqtóbe oblysynda «Nurly jer» memlekettik baǵdarlamasy úsh baǵyt boıynsha júzege asyrylýda. Birinshi baǵyt boıynsha bank salymshylary «Nur Aqtóbe» aýdanynda salynyp jatqan úsh qabatty úılerdi Turǵyn úı qurylys jınaqtary júıesi arqyly ala alady. Ekinshi, ıaǵnı jeke turǵyn úı qurylysyn damytý baǵyty boıynsha, salymshylardyń «Nur-Aqtóbede» salynyp jatqan kotejderdi satyp alýǵa múmkindikteri bar. Sondaı-aq salymshylar Batys-2 aýdanynda jeke qurylys kompanıalar salyp jatqan turǵyn úılerden ala alady, bul baǵyt boıynsha 128 páter jeltoqsan aıynda beriledi.
— «Nurly jer» baǵdarlamasy boıynsha bir sharshy metrdiń quny 100 000 teńgeden bastalady. Nesıeniń jyldyq mólsherlemesi 5 paıyzdan bastalady. Salymshylardyń bastapqy jarnasynyń kólemi páter qunynyń 30 paıyzynan kem bolmaýy kerek. Úıler daıyn kúıinde beriledi.
Turǵyn úı qurylys jınaq banki salymshylar pýly quryldy, qazirgi ýaqytta «Nur Aqtóbe» aýdanynda salynǵan turǵyn úıge ótinish bergen azamattardyń tólem qabilettiligi tekserilip jatyr.
Sondaı-aq qazir «Nurly jer» baǵdarlamasynyń aıasynda «Turǵyn úı qurylys jınaq júıesi arqyly nesıelik turǵyn úı salý» baǵyty boıynsha turǵyn úı satyp alýshylarynyń pýlyna qosymsha qabyldaý júrgizilip jatyr. «Nur Aqtóbe» aýdanyndaǵy úsh qabatty jáne toǵyz qabatty úılerdiń páterleri satýǵa shyǵarylyp otyr, — deıdi Aqtóbe qalasyndaǵy Turǵyn úı qurylys jınaq banki bıznesti damytý bóliminiń bas mamany Nurbolat Batyr.
«Nurly jer» baǵdarlamasynyń «Jeke turǵyn úı qurylysyn damytý» pılottyq baǵyty boıynsha 194 jeke úı, tómen deńgeıli úılerden 949 páter, 9 qabatty úılerde 1184 páter qoldanysqa berildi.
— «Nur Aqtóbe» kotej qalashyǵyndaǵy eki qabatty úılerdiń qurylys alańdary 114-152 sharshy metr. Onyń 1 sharshy metriniń baǵasy 120 000 teńgeden aspaıdy. Úıler jer teliminde kezekte turǵan adamdarǵa usynylady. Jerdi tegin, úıdi satyp alady. Ol úshin Turǵyn úı qurylys jınaq bankinen 30 paıyz bastapqy jarnamen, jyldyq 5 paıyzben nesıe rásimdeı alady, — deıdi N.Batyr.
