«Turǵyn úı qurylys jınaq banki» aksıonerlik qoǵamy jelisi arqyly Aqtóbe qalasynda «Nurly jer» baǵdarlamasy boıynsha salynǵan turǵyn úıler berile bastady. Aqtóbe qalasyndaǵy turǵyn úı qoryn esepke alý sektorynyń meńgerýshisi Janargúl Dúısekenova bastaǵan top atalǵan baǵdarlama boıynsha «Nur Aqtóbe» shaǵyn aýdanynda salynyp jatqan páterler men kotejderge bank salymshylarynyń qalaı qol jetkizýge bolatyndyǵyn aıtty.

Janargúl Dúısekenovanyń aıtýynsha, shaǵyn aýdanda boı túzegen 9 qabatty turǵyn úıdegi páterlerdiń bir sharshy metri 100-110 myń teńge bolsa, 3-4 qabatty turǵyn úıdegi páterlerdiń 1 sharshy metri 120 myń teńge turady.

— Búgingi kúni «Nur Aqtóbe» shaǵyn aýdanyndaǵy kotejderdi bólý jumystary júrgizilip jatyr. Qazirgi tańda bul mańǵa 8 túrli jobadaǵy 100-den asa kotej salyndy. Bolashaqta bul jerde barlyǵy 194 kotej turǵyzylatyn bolatyn. Kotejderdiń 1 sharshy metri 120 myń teńgege baǵalanady. Shaǵyn aýdandaǵy kotejder bir jáne eki qojaıynǵa arnap salynǵan. Sondyqtan túrli jobada salynǵan úılerdiń aýdany da ártúrli. Atap aıtsaq, keıbireýiniń jalpy aýdany 156 sharshy metr bolsa, endi bireýi shaǵyn, ıaǵnı aýdany 128 sharshy metr. «Nurly jer» baǵdarlamasynyń maqsaty — azamattarǵa tómen paıyzben úı alýǵa jáne jer, úı alý kezeginde turǵan azamattardyń sanyn azaıtýǵa múmkindik beredi. Taǵy bir aıta ketetin jaıt, azamattar jer, úı alý kezegine tirkelisimen-aq osy baǵdarlamaǵa qatysyp, baspana alýyna ábden múmkindigi bar,— dedi J.Dúısekenova.

«Nur Aqtóbe» shaǵyn aýdanynda «Nurly jer» baǵdarlamasy boıynsha turǵyzylyp jatqan kotejderge ishki árleý jumystary júrgizilgen. Sol sıaqty, barlyq ınfraqurylym tartylǵan. Páter alýshylarǵa óz talǵamdarymen túsqaǵaz japsyrý isi ǵana qalypty.

— Úıler ártúrli qurylys materıaldarynan salynyp jatyr. Biriniń qabyrǵasy kirpishten turǵyzylsa, endi biri ekotonnan, sol sıaqty panelden turǵyzylǵan úıler de bar. «Nurly jer» baǵdarlamasy boıynsha Aqtóbede birinshi bolyp salynyp jatqan kotejder búginde paıdalanýǵa berilip jatyr. Osyndaı kotejder men páterlerdi jer, úı alý kezeginde turǵan jáne «Turǵyn úı qurylys jınaq bankinde» salymy bar azamattar ǵana ala alady, — dedi J.Dúısekenova.

Endi bank salymshylary burynǵydaı alǵashqy jarnanyń 30 paıyzyn emes, 20 paıyzyn jınasa jetip jatyr. Úıdiń qalǵan qarajatyn «Turǵyn úı qurylys jınaq banki» AQ-y arqyly nesıe alyp, óteýine múmkindik qarastyrylǵan.

— Bank salymshylary retinde aýdan turǵyndary da osy baǵdarlamaǵa qatysa alady. Kotejderge qol jetkizgen salymshylarǵa úıiniń mańynan qosymsha 10 sotyq jer beriledi. Belgilengen aýmaq jer qatynastar arqyly rásimdeledi, — dedi J.Dúısekenova.

Búgingi kúni oblys boıynsha «Turǵyn úı qurylys jınaq banki» AQ Aqtóbe fılıalynda 88 myń salymshy bar. «Qazaqstan Respýblıkasynyń árbir azamaty «Nurly jer» memlekettik baǵdarlamasyna qatysa alady. Ol úshin «Turǵyn úı qurylys jınaq bankinde» azamattardyń salymy bolýy tıis. Buǵan deıin bank arqyly páter alýshylarǵa páter aqysynyń 30 paıyzyn jınaý mindettelgen edi. Bıyl 26 maýsymda ótken úkimettik keńeste ózgerister engizilip, endi alǵashqy jarna quny 20 paıyz boldy. Nesıe burynǵydaı 5 paıyzdyq syıaqymen 21 jyl merzimge deıin beriledi. Iaǵnı kotejder úshin de, páterler úshin de salymshylar 20 paıyz alǵashqy jarna jınaıdy. Bıyl «Nurly jer» memlekettik baǵdarlamasy boıynsha paıdalanýǵa beriletin 2300 páterdiń búgingi kúni 1000-ǵa jýyǵyn satyp úlgerdik. Atalǵan baǵdarlamaǵa qatysýǵa apta saıyn, aı saıyn tapsyrys berýshiler bar. Eger páter alýshylardyń tólem qabileti jetpese, bul iske qosalqy qaryz alýshylardy tartýǵa bolady. Olar bir nemese ekeý ǵana bolady, — deıdi «Turǵyn úı qurylys jınaq banki» AQ Aqtóbe fılıaly bıznesti damytý bóliminiń basshysy Nurlan Balǵojıev.