Aqtóbe qalasynda elimiz boıynsha balamasy joq «Yurta park» otbasylyq demalys saıabaǵy ashyldy.

K.Nokın dańǵylynyń boıynda ornalasqan demalys saıabaǵynyń aýmaǵy — 3,5 gektar. Aýmaq úsh bólikke, ıaǵnı ákimshilik, mádenı, oıyn-saýyq jáne sporttyq saýyqtyrý alańyna bólingen. Saıabaqty aqtóbelik jáne almatylyq kásipkerler salǵan. Jobany júzege asyrý úshin bir mıllıard teńgege jýyq qarjy jumsalǵan.

— Saıabaq otbasylyq demalysqa arnalǵan. Sondyqtan tek balalar úshin ǵana emes, úlkenderdiń de tynyǵýyna jaǵdaı jasalǵan. Oıyn-saýyq alańdarynan bólek tamaqtanýǵa arnalǵan oryndar bar. Bolashaqta saýda, oıyn-saýyq býtıkteri, qonaqúı, keńse salynady. Jergilikti turǵyndar salaýatty ómir saltyn saqtap, taza aýamen tynystap, bos ýaqytyn otbasyna arnaý úshin jasalǵan jaǵdaı, — deıdi «Nuraı ınvest grýpp» AQ-nyń bas dırektory Erbol Muhametjan.

Ashyq aspan astyndaǵy saıabaqta jasandy jartas, arqan baǵy, kitaphana, planetarıı, sadaq atatyn stendter, etnoaýyl bar. Ulttyq naqyshta bezendirilgen kıiz úılerde qazaqtyń salt-dástúrinen syr shertetin óner týyndylary qoıylǵan. Bul jerde arnaıy mamandar sheberlik sabaqtaryn ótkizedi. Aladaǵy ýaqytta haıýanattar baǵy bolady. Erbol Muhametjannyń aıtýynsha, bul qala balalary úshin qyzyq bolmaq. Qulyn, buzaý, qozy jáne túrli úı qustaryn balalar tamashalaı alady jáne atpen serýendeýge de múmkindik jasalǵan. Sondaı-aq batýt, aýmaǵy 20-30 metr bolatyn labırınt jáne rolıkke arnalǵan jol bar. Al qysta bul jerde muz aıdyny bolady. Tamyz aıynda baseın, spa-salon, saýna, jattyǵý zaly ashylady. Máselen, bala saıabaqtaǵy túrli atraksıondarda oınap bolǵansha, ata-anasy spa-salonnyń qyzmetine júginedi nemese shaǵyn gólf alańynda, boýlıńte kóńilin kóteredi.

— Múmkindigi shekteýli balalar úshin de arnaıy alań ashtyq. Bul jerdegi atraksıondarda olar erkin oınaı alady. Sonymen qatar az qamtylǵan, kópbalaly otbasylarǵa jeńildikter qarastyrylǵan. Olar arnaıy qujatyn kórsetip, kire alady. Al birinshi toptaǵy múgedekterge saıabaqqa kirý tegin, — deıdi bas dırektor.

Jasyl jelekke kómkerilgen tynyǵý orny kelýshilerge erekshe kóńil kúı syılaıdy. Qolshatyr, kóbelek jáne túrli gúldermen bezendirilgen arqalyqtar saıabaqqa erekshe sán berip tur. Bul jerde jas jubaılardyń sýretke túsýine arnalǵan arnaıy alań bar.

Qala turǵyndarynyń qýanyshymen bólisken Aqtóbe qalasynyń ákimi İlıas Ispanov saıabaqta demalýdyń paıdasyna toqtalyp, otbasylyq demalys úshin jasalǵan mol múmkindik ekenin aıtty.