Elorda kúni qarsańynda Aqtóbe oblysynyń ortalyǵynda akvaparktiń ashyldy. Bul kún jergilikti turǵyndardy erekshe qýanyshqa bóledi. Saltanatty sharaǵa oblys ákimi Berdibek Saparbaev pen qala ákimi İlıas Ispanov qatysty.
Aqtóbelikterdi Elorda kúnimen quttyqtaǵan oblys ákimi akvaparktiń balalarǵa tamasha kóńil kúı syılaıtynyn atap ótti.
— Sizderdi Astananyń 20 jyldyǵymen — Elorda kúnimen shyn júrekten quttyqtaımyn. Bul árbir qazaqstandyq úshin qazaq halqynyń elimizdiń jańa tarıhyndaǵy memlekettik táýelsizdik alýǵa baılanysty jetistikterin bildiretin aıtýly kún. Astana Prezıdent Nursultan Nazarbaevtyń strategıalyq baǵyty tabysynyń nyshanyna aınaldy. Qazaqstannyń jańa astanasyn memleket basshysynyń týyndysy jáne saıasaty saltanatynyń aıqyn kórinisi dep tolyǵymen sanaýǵa bolady. Osy merekede oblysymyzda jalpy quny 10 mıllıard teńge turatyn 32 jańa nysan ashylady. Olardyń qatarynda qala turǵyndary men qonaqtary úshin súıikti demalys ornyna aınalady senim bildirip otyrǵan akvapark ta bar, — dedi oblys ákimi.
«Baqytty bala» óńirlik jobasy aıasynda az qamtylǵan otbasylardyń balalaryna akvaparkte tegin qydyrý úshin sertıfıkattar tartý etildi.
Qalanyń qaq ortasynda ornalasqan akvapark 3 gektar alańdy alyp jatyr, munda tóbeshigi bar úsh baseın ornalasqan. Sýly atraksıondary bar balalar aımaǵy jeke ornalasqan. Demalýǵa kelýshiler úshin barlyq jaǵdaı jasalǵan. Munda kún saıyn myńnan astam adam tynyǵa alady. Aldaǵy ýaqytta akvaparkty joǵarydan kúmbezdep jabý jospary bar, ol kezde jyl boıy demalys uıymdastyrý múmkindigi týady.
— Biz úshin Aqtóbede akvaparktiń ashylýy — erekshe oqıǵa. Onyń qurylysy ótken jyly bastalǵan bolatyn. Parktiń jazǵy aımaǵyndaǵy jumystar tolyǵymen aıaqtaldy. Qazir jabyq bóligin qurylymdaý ústindemiz. Bizdiń kompanıamyz osymen úshinshi akvaparkti paıdalanýǵa berip otyr. Buǵan deıin Aqtaý jáne Qyzylorda qalalarynda osyndaı demalys ornyn ashqanbyz. Jeti jasqa deıingi balalar tegin kire alady, al balalar men úlkender úshin baǵa 3-7 myń teńge aralyǵynda, — deıdi «Tree of life» qurylys salý kompanıasynyń quryltaıshysy Kámıla Sýrbaeva.
Jobaǵa salynǵan ınvestısıanyń jalpy mólsheri 5,8 mıllıard teńge dep baǵalandy.
