Qazaqstan prezıdenti Nursultan Nazarbaev Qaraǵandynyń mıllıoner qala atanǵanyn qalaıdy, dep jazady Qamshy.kz aqparat agenttigi.

«Búgin maǵan Qaraǵandynyń ashyq alańdaǵy jańa ortalyǵyn kórsetti. Esime taza, ashyq alańda Astanany salǵan kezim tústi. Ondaı jerde kez kelgen arhıtektýralyq oılaryńdy júzege asyra alasyń. Qalanyń ortalyǵy osynda bolady. Bul jerde jumys istep júrgenimde qazirgi ýaqytta ákimdik pen ózge de záýlim ǵımarattary bar Qaraǵandynyń astynda joǵary sapaly kómirdiń mıllıardtaǵan tonnasy jatqanyn biletin edik.

70 jyldary SSRO kómir ónerkásibi mınıstrligi kómirdi shyǵarý úshin qalany Ońtústik Shyǵysqa kóshirýdi josparlaǵan. Bálkim, bári birden bola qoımas. Biraq úlken qalany dál osy ortalyqta salý kerek», - dedi memleket basshysy Qaraǵandy oblysyn áleýmettik-ekonomıkalyq damytý týraly otyrys barysynda.

Nazarbaevtyń pikirinshe, Qaraǵandy tórtinshi mıllıoner qala atanýǵa ábden laıyq ári múmkindigi zor.

«Búginde qalada 500 myń adam turady. Qaraǵandynyń mıllıoner qala atanǵanyn qalaımyn. Almatyda 2 mıllıonǵa jýyq adam bar, Astanadaǵy mıllıon turǵyn 2030-a deıin eki mıllıonǵa jetip qalýy ǵajap emes. Shymkent te mıllıoner qala búgin. Al endi mıllıoner qalalardyń sanatyna Qaraǵandy qosylýy kerek. Ol úshin adamdardyń jumys isteýine yńǵaıly kásiporyndardy damytý kerek», - dedi Elbasy.

Aıta keteıik, Nursultan Nazarbaev resmı saparmen Qaraǵandyǵa barǵan. Onda Elbasyna turǵyn úıler men áleýmettik nysandardyń qurylysy týraly baıandaldy.