Astanada ótken baspasóz konferensıasynda dástúrli «Altyn tulpar» alaman báıgesiniń ótetin, ótpeıtinine baılanysty jýrnalısiń saýalyna jaýap bergen Bekbolat Tileýhan atbegilerden keshirim surady, dep habarlaıdy Qamshy.kz aqparat agenttigi Baq.kz saıtynyń deregin negizge alyp.
Onyń aıtýyna qaraǵanda «Altyn tulpar» alamany eki jylda bir ret ótip turatyn bolady.
«Keıbir atbegilerimizdiń tarapynan eki jylda bir ret ótip tursa degen usynystar da boldy. Sondyqtan kelesi jyly amanshylyq bolsa, ótetini anyq. Al bıyldyqqa jaǵdaı osyndaı boldy» - deıdi Ulttyq sport túrleri qaýymdastyǵynyń prezıdenti.
Osy oraıda, jyl boıy «Altyn tulparǵa» arnap at baptap, onysyn basqa báıgelerge salmaı, alamandy kútken atbegilerdiń eńbegi, attyń obaly ne bolady degen zańdy suraq týyndady.
«Bul jaǵdaıǵa shynymen keshirim suraımyn! Keıde dittegen maqsatyńa múmkindigiń sáıkes kelmeı qalady. Jasyratyny joq, men de «Altyn tulparǵa» bir at daıyndap otyr edim. Alamanǵa at daıyndaǵan adamnyń bári ekinshi oryn alam dep baptamaıdy, elý at qossa, elýi de birinshi orynnan dámeli bolady ǵoı. Endi osy bir qolymyzdan kelmeı qalǵan dúnıege baılanysty atbegi baýyrlarymnan keshirim suraımyn!» - dedi Bekbolat Tileýhan.
