Qazaq kókparshylary ómiri kókpar oınamaǵan ózbekterge ese jiberdi. Ózbekterden jeńilgenimizdiń kýágári bolǵan qyrǵyzdar kúıinip, ashýǵa mindi. Qyrǵyz memleketiniń "Kók bóri" Federasıasynyń burynǵy vıse-prezıdenti Talas Begalıev qazaq kókparshylaryn jerden alyp, jerge saldy. Áleýmettik jelini dúr silkindirgen vıdeoda qyrǵyz baýyrymyz Meıirjannyń esimdi kókparshynyń esimin atap, "Durystap oınamaısyńdar ma?" dep keııdi. Qamshy.kz aqparat agenttigi Qazaqstannyń kókpar quramasynda oınaıtyn, shýly vıdeonyń basty keıipkeri Meıirjan Matjannyń nómirin izdep, habarlasty. Alǵashynda ol bul oıyn týraly eshqandaı pikir bildirgisi kelmeıtinin aıtty. Birneshe mınýttyq áńgimelesýden keıin Meıirjan jibidi.

-Meıirjan, fınalǵa ótpedińizder. Áıtpese qyrǵyzdarmen kúsh-baq synasatyn edińizder. Jarty fınaldaǵy sol oıyn týraly ne aıtasyz? Oıyn qanshalyqty kóńilińizden shyqty?

-Oıynda utyldyq. Basqa aıtarym joq.

-Barymdy salyp oınadym dep aıta alasyz ba? 

-Álbette, barymyzdy saldyq qoı.

-Talas Begalıevtiń "urysyn" estińizder. Kóńilge kirbiń túspedi me?

Eshkimniń aldynda aqtalǵym kelmeıdi. "Instagram paraqshamaǵa kirip, sońǵy vıdeolardaǵy halyqtyń pikirin oqyp shyǵyńyzshy. Qazaq ta, qyrǵyz da kórsetken ónerime rıza. Basqa kókparshylarda ınstagram joq. Bolǵan kúnde olarǵa da halyq solaı pikir bildiretin edi. Sebebi biz bar kúsh-jigerdi salyp oınadyq.

-Jylqyda da jylqy bar. Jylqylaryńyz ózderińizdiki emes, qyrǵyzdyki eken...

Onysy ras. Sol da áser etken bolýy kerek dep oılaımyn. Sebebi qyrǵyzdyń jylqylary álsiz bolyp shyqty. Al, nege óz sáıgúlikterimizben kelmedik dep suraq qoısańyz, onyń sebebin men bilmeımin. Estýimshe, qyrǵyzdar ózderi qolqa salǵan.