Osy aptada áleýmettik jelide qyzý talqylanǵan taqyryptardyń biri sheteldiń «Sanofi» kompanıasyna qatysty. Farmasevtıka salasynyń alyby Qazaqstan naryǵynda ónimderin saýdalaý úshin barmaq basty, kóz qysty áreketterge barǵan. Jáne sol úshin jaýapqa da tartylypty.
Belgili bolǵandaı, fırmanyń ortalyǵy ornalasqan AQSH bıligi farmkompanıanyń bul bylyqtaryn bilip qoıǵan. Sóıtip, jemqorlyqty sý qany súımeıtin olar jazanyń eń tıimdi ádisin qoldanǵan kórinedi. Aty dardaı kompanıaǵa 25 mln dollar aıyppul salyp, biraz shyǵyndatypty. Kompanıa bolsa bul iske qatysy bary-joǵy týraly tis jarmaǵanymen, aıyppuldy tóleýge únsiz kelisken eken. Osydan keıin bári jaqsy dep, máseleni jyly jaýyp qoıa salýǵa bolar edi. Alaıda, oqıǵanyń kóleńkeli tustary kóp bolyp tur. Parany bergender týraly estidik. Al, parany alǵan kimder sonda? Bul týraly Eýrazıa birinshi arnasy habarlaıdy.
Qazir basyń aýyryp, baltyryń syzdaǵany bylaı tursyn, sál sýyq tıse boldy, janymyz shyǵyp dárihana jaǵalaıtynymyz bar.
Alaıda, sol densaýlyǵymyzǵa mańyzdy dári-dármektiń ózi elge jemqorlyqpen jetkiziledi eken.
Bul týraly jýyrda AQSH-tyń qymbat qaǵazdar men bırja jónindegi komısıasy jeke saıttarynda jarıalady. Belgili bolǵandaı, fransýzdyń «Sanofi» farmkompanıasy ónimderin Qazaqstan naryǵynda saýdalaý úshin el sheneýnikterine para bergen kórinedi.
Biraq, qazir jurtty qyzyqtyryp otyrǵany basqa. Parany bergender jóninde estidik deıik. Al, sonda ony alǵan kim?
Muny bas dárigerdiń ózinen surap bilýdi jón kórdik. Alaıda, ol kisi bul jóninen habarsyz bolyp shyqty!
«Bizdiń elde bul kompanıaǵa ıa olardyń dıstrıbúterlerine para berý, nemese basqa da qylmystyq quqyq buzýshylyqtar faktileri tirkelmegen» - deıdi QR Densaýlyq saqtaý mınıstri Eljan Birtanov.
Bul suraqtyń endi kóp suraqtaı kókeıimizde kólkip qalary sózsiz! Biraq, qamyqpańyzdar!
Óıtkeni, ár oqıǵadan memleket bolsyn, adam bolsyn, ózine paıdaly bir dúnıe túıip jatady!
Bizdińshe, dál osy máselede bizge AQSH tarapynyń áreketi úlgi bolý kerek.
Farmkompanıanyń barmaq basty, kóz qysty áreketke barǵanyn bilip qoıǵan olar, kompanıaǵa 25 mln dollar aıyppul salyp, jemqorlyqpen kúrestiń jarqyn úlgisin kórsetti!
«Aıyppul turǵysynan kelgende Amerıkanyń qylmystyq zańdary bizge qaraǵanda qatal. Óıtkeni bizde qylmystyq zań boıynsha eń aldymen zańdy tulǵalardy qylmysqa tartpaımyz, biz tek jeke tulǵalardy jaýapqa tartamyz. Odan keıin taǵaıyndaý múmkin bolatyn aıyppul mólsheri aılyq eseptik kórsetkish ıa para mólsherimen ǵana shekteledi» - deıdi zańger Nurlan Nıetýllaev.
