Búgin «Nur Otan» partıasy tóraǵasynyń birinshi orynbasary Máýlen Áshimbaev Batys Qazaqstan oblysyna jumys saparymen bardy. Oblys aktıvi jıynynda Elbasynyń 5 áleýmettik bastamasy aıasynda óńirde atqarylyp jatqan jumystar saralanyp, aqparattyq tehnologıalardy barlyq salada tıimdi qoldaný jaıy talqylandy.
Bas qosýdy ashqan oblys ákimi bıylǵy 1 maýsymda ótken partıanyń saıası keńesinde Elbasy, partıa tóraǵasynyń partıa qyzmetin jańǵyrtý aıasynda 20-dan astam jobany júzege asyrýdy tapsyrǵanyn aıtty. Osy oraıda partıanyń oblystyq fılıalymen aýqymdy jumystar atqarýda.
- Nátıjesinde aýyl-aımaqtarda jańashyl baǵyttaǵy qvorkıng ortalyqtar ashylyp, kitaphanalardyń jumystary jandandy, zaman talaptaryna saı qaıta túledi. 8 IT synyptar ashylyp, mektep asqanalary men sport alańdaryn jańǵyrý, aýyldyq jerlerde aǵylshyn tilin úırený úshin qolaıly orta qalyptastyrý sıaqty naqty jobalarymyz bar. Bastaýysh partıa uıymdaryna erekshe nazar aýdarylyp, olardyń jumysyna qoldaý kórsetilip, olarǵa júktelip otyrǵan naqty jumystardyń sapasyn arttyrýǵa múmkindik berildi. Oblysymyzda partıalyq kadrlar rezervin belsendi saıası memlekettik jáne ákimshilik laýazymdardy usyný jumystary, merıtokratıa prınsıpinde qabilettiligine jáne iskerligine saı saılanbaly organdarǵa irikteý jumystary júrgizilip keledi, - dedi Altaı Kólginov.
90 páterlik turǵyn úı 7 aıǵa jýyq ýaqytta salynyp bitti. Baspana birinshi kezekte úıge muqtaj azamattarǵa berilmek. Jartysy «7-20-25» baǵdarlamasy talaptarymen saýdalanady. «Nur Otan» partıasy tóraǵasynyń birinshi orynbasary Máýlen Áshimbaev qýanysh ıelerine páter kiltterin saltanatty túrde tabystady.
BQO-ǵa jumys saparymen kelgen «Nur Otan» partıasy Tóraǵasynyń birinshi orynbasary Máýlen Áshimbaev oblys ákimi Altaı Kólginovpen birge atalmysh baǵdarlamanyń óńirdegi alǵashqy qatysýshylaryna páter kiltterin tabys etti.
Máýlen Áshimbaev «7-20-25» baǵdarlamasy qoǵamdaǵy eń ózekti máselelerdiń biri - baspana jaıyn tıimdi sheshýge baǵyttalǵan mańyzdy bastama, ásirese, jas otbasylar úshin úlken múmkindik ekendigin jetkizdi.
7 aıda óńirde 251 myń sharshy metr turǵyn úı paıdalanýǵa berilgen. Bul ótken jylmen salystyrǵanda 9 paıyzǵa artyq. Bıyl oblys ortalyǵynda bir ǵana «Nurly jer» baǵdarlamasy arqyly 21 turǵyn úı salynbaq. Qadeshevter áýletinde búgin úlken qýanysh. Úıdiń kenjesi Aınashtyń endi óz páteri bar. Aýdandyq aýrýhanada zańger bolyp qyzmet isteıtin ol «Turǵyn úı» jınaq bankinen shot ashyp, qarajat jınaǵan.
- Baspanany kez kelgen otbasy úshin bolashaqqa salynǵan ınvestısıa desek te, artyq emes. Osylaısha Elbasy barsha qazaqstandyqtardyń úıli bolýyna dańǵyl jol ashyp, ıpotekalyq nesıelerdiń qoljetimdiligin qamtamasyz etip otyr. Osy sapar nátıjesinde bes bastamanyń Batys Qazaqstan oblysynda tabysty júzege asyrylyp jatqanyna kýá boldyq. Aldaǵy ýaqytta da partıa bul jumystardy baqylaýdy jalǵastyra beredi, - dedi partıa Tóraǵasynyń birinshi orynbasary.
Aıta keteıik, óńirde turǵyn úı qarqyndy salynýda. Bıylǵy jeti aıda 250 myń sharshy metrden astam baspana iske qosyldy. Jyl sońyna deıin taǵy 415,7 myń sharshy metr, sonyń ishinde bes áleýmettik bastamanyń birinshi baǵyty boıynsha 46 myń sharshy metr turǵyn boı kótermekshi. «7-20-25» baǵdarlamasyn júzege asyrýǵa jaýapty ekinshi deńgeıli bank ókilderiniń sózine qaraǵanda, BQO boıynsha 55 ótinish kelip túsken. Oral qalasy boıynsha 19 myń adam turǵyn úı kezeginde tur.
