Túrkistan oblysynyń Kentaý qalasyndaǵy qalalyq ortalyq aýrýhanasynda zamanaýı joǵary tehnologıalyq tekserý múmkindigi bar ınsýlt ortalyǵy paıdalanýǵa berildi.

Aýrýhana bazasynda ashylǵan ınsýlt ortalyǵy kompúterlik tomografıamen jabdyqtalǵan. Zaman talabyna saı jańa qondyrǵy ınsýlt pen bas mı jaraqatyn naqty anyqtaýǵa múmkindik beredi.

Zamanaýı úlgidegi medısınalyq qurylǵy Japondyq Optima 540 kompúterlik tomografıasyn satyp alýǵa oblystyq búdjet esebinen 269,5 mln. teńge bólingen.

Endigi kezekte Kentaýlyqtarǵa atalǵan medısınalyq qyzmetti alý úshin basqa qalaǵa sapar shekpeýine de bolady.

Jańa tehnologıa, adam densaýlyǵy syr bergennen syrqatty anyqtap beredi.

«Kompúterlik tomografıa aýrýdy alǵashqy belgilerinen-aq anyqtaýǵa múmkindik beredi. Apparattyń kómegimen bastaǵy isikter men qabyný prosesin, súıek qurylymyndaǵy aýrýlardyń aýyr jaǵdaıynyń ózin naqty tabýǵa bolady», – deıdi mamandar.

Sonymen qatar, mundaı tehnologıa arqyly keýdeni, asqazan, ash ishektiń, muryn qýysy men búırektegi aýytqýlardy tekserýge bolady.

Eske sala ketetin jaıt, Túrkistan oblystyq densaýlyq saqtaý basqarmasynyń basshysy Muqan Egizbaevtyń aıtýynsha, kelesi jyldan bastap jańa oblys ortalyǵynda birneshe aýrýhana men emhanalar, perzenthanalar men zamanaýı talapqa saı emdeý ortalyqtary boı kótermek. Jobalaý jumystaryna sheteldik kompanıalar da tartylady dep kútilýde.

«Jospar boıynsha oblys ortalyǵynan 610 oryndyq oblystyq kópsalaly aýrýhana salynady. Ekinshiden, oblystyq balalar aýrýhanasyna qosymsha 150 oryndyq ǵımarat qurylysyn bastaý qolǵa alynyp jatyr. Sondaı-aq, 500 kelýshige arnalǵan emhana men oblystyq qan jáne SPID ortalyqtarynyń, týberkýlezge qarsy jáne onkologıalyq dıspanserdiń qurylysy bastalady. Bul maqsatta jobalaý-smetalyq qujattaryna qajetti qarjy bólindi», –deıdi basqarma basshysy.

Aıta ketelik, kompúterlik tomografıa aǵzanyń barlyq bólimderi men júıelerine zertteýdi júrgizýge múmkindik beredi. Qarama-qarsy tústerdi qoldanyp, baǵdarlamanyń arnaıy paketterin qosý arqyly júrektiń aterosklerozy kúre tamyrynyń zaqymdaný deńgeıin anyqtaýǵa, osteoporoz aýrýyna kúdiktengen jaǵdaıda, súıek tinderiniń mıneraldy tyǵyzdyǵyn anyqtaı alady. Kompúterlik tomografty ártúrli baǵdarlamalarmen júrgizý sapasy Fraıbýrg qalasy Ýnıversıtettik klınıkasynyń jetekshi mamandarymen joǵary baǵalanǵan.