«Úzdik ınovasıalyq joba» baıqaýy bıyl da óz jalǵasyn tapty. 2013 jyldan ótkizilip jatqan sharany Almaty qalasy jastar saıasaty máseleleri jónindegi basqarmasynyń tapsyrysymen «El-shejire» qoǵamdyq qory uıymdastyryp otyr. 3 aı ýaqyt ishinde joǵarǵy oqý oryndarynyń stýdenterinen 30-ǵa jýyq áleýmettik jáne bıznes jobalar kelip tústi. Jastardyń jumysyn qazylar alqasy 7 qyrkúıek kúni iriktedi.
Baıqaýǵa «Aıqyn» gazetiniń bas redaktory, pýblısıs Nurtóre Júsip, «Baıqadam» holdıńiniń basqarýshysy – Arman Baıqadam, «AH-GROUP» BAZA JSHS bıznes jattyqtyrýshy Jan Aqsartov, Almaty qalasy jastar saıasatyn damytý memlekettik qorynyń dırektory Alma Aýǵanbaeva qazylyq etti. Nurtóre Júsip óziniń kóńilinen shyqqan úsh jobany erekshe atap, is júzinde júzege asyrý kerek ekenin alǵa tartty. Al «Baıqadam» holdıńiniń basqarýshysy – Arman Baıqadam, ár jobaǵa jeke-jeke toqtalyp, jumys jetekshilerin suraqtyń astyna aldy. Buǵan qosa, kemshil tustaryn kórsetip, túzetý joldaryn aıtty. Sonymen qatar óziniń búginge deıingi bıznes haqyndaǵy mol tájirıbesimen bólisti. Alma Aýǵanbaeva hanym da jastarymyzdyń óz maqsatyn aıqyndap, naqty joldaryn tapqanyna qýanatynyn jetkizdi. Budan bólek «Elimizde bıznes salasy kún sanap qaryshtap damýda. Búgingi jastarymyzdyń ıdeıasy da maǵan qatty unady. Bolashaqta halyqqa paıdasy tıetin jobalar bolady degen oıdamyn»- dep sózin túıindedi. Osylaısha birinshi kezeńde barlyǵyna joǵary baǵa berilip, tegin trenıńterge joldama aldy. Trenıńterdi Jastar Innovation jobasy aıasynda kásibı bıznes trenerler jáne jetekshi kásipkerler júrgizedi. Basqosý Almatydaǵy SmArt Point Kovorkıng ortalyǵy men DEPO Evolution Park jastar loft ortalyǵynda ótedi.
Bir aı ishinde qatysýshylarǵa jetekshi mamandar bilim berip, óz salasy jaıyndaǵy mol tájirıbesimen bólisedi.
Baıqaý bastaýshy kásipkerlerdiń kásipkerlik qyzmet sheńberinde tájirıbe almasýyna arnalǵan kópir desek artyq aıtqanymyz bolmas.
Qazaqstannyń jas kásipkerlerine tálimger retinde tanymal kásipkerler tańdalyp alyndy. Olar kezdesý barysynda isker, tabysty kásipkerlermen kezdesip, olardyń jetken jetistigi jaıyndaǵy mol tájirıbelerimen tanysady.
