QR Densaýlyq saqtaý mınıstri Eljan Birtanov salany sıfrlandyrý pasıentterdi alys qashyqtyqtan qalaısha emdeýge jol ashatynyn aıtyp berdi.
«Medısınalyq mobıldi qosymshalar men sıfrlyq tehnologıalar adamdardyń árbir personaldyq elektrondy jazbasyn tirkeı otyryp, jaǵdaıyn alystan baqylaýǵa jol ashady», – deıdi E. Birtanov.
Osy maqsat boıynsha 2020 jyldyń sońyna deıin halyqtyń 100%-yn elektrondy densaýlyq pasportymen qamtamasyz etý josparlanyp otyr.
Mınıstrdiń aıtýynsha, aǵymdaǵy jyly arnaıy alań iske qosylady. Ol alań medısınalyq aqparattyq júıelerdi kezeń-kezeńmen ıntegrasıalap, halyqtyń elektrondy densaýlyq pasporttarynyń biryńǵaı bankin iske qosýǵa múmkindik beredi. Osylaısha, aldaǵy ýaqytta Qazaqstandaǵy árbir balanyń týǵanynan bastap elektrondy medısınalyq tarıhy úzilissiz toltyrylatyn bolady.
Qazirgi tańda elimizde medısınalyq sıfrlyq aqparattyq júıege kóshý jappaı qolǵa alynyp, júzege asyrylýda.
«Medısına qyzmetkerleriniń jumys oryndaryn kompútermen qamtamasyz etý deńgeıi qalalar men aýdan ortalyqtarynda 85,2%-dy quraıdy», – dedi ol.
Sondaı-aq, mınıstr jyldyń sońyna deıin 100%-dyq deńgeıde medısınalyq uıymdarda elektrondy medısınalyq jazba júıesine engizý kózdelip otyrǵanyn aıtyp ótti. Halyqtyń elektrondy pasportpen qamtylý kórsetkishi qazirgi tańda 11 mıllıonǵa jetken. Bul qadam medısınalyq qyzmet alý prosesi jáne dári-dármektermen qamtamasyz etýdiń ashyqtyǵy men yńǵaılylyǵyna jol ashady.
Mınıstr 2021 jyly tegin medısınalyq kómek kórsetý baǵyty boıynsha qarjylandyrý úlesiniń 50%-ǵa jetetinin málim etti.
«Qazaqstan densaýlyq saqtaý salasynyń ulttyq júıesi jumysynyń jaıly nátıjesine qaramastan, medısınalyq qyzmet kórsetý sapasy men ashyqtyǵy turǵysynda, bilikti medısınalyq kadrlarmen qamtamasyz etýde áli de másele bar. Joǵaryda atalǵan máseleni sheshý úshin medısınalyq kómek sapasyn arttyrý boıynsha birqatar sharalar legi qolǵa alynyp jatyr», –deıdi ol.
Mınıstr atap ótkendeı, negizgi aýrýlardan emdeý úshin bıyl 3,5 mln adam tegin dári-dármekpen qamtylatyn bolady. Bul kórsetkish 2016 jylmen salystyrǵanda 15,7 paıyzǵa artty.
«Dári-dármekpen qamtý prosesiniń ashyqtyǵy men tıimdiligin arttyrý úshin 2018 jyldyń 1 qyrkúıeginen bastap ambýlatorıalyq medıkamentterdi satyp alý ortalyqtandyrylyp, satyp alý onlaın-translásıa arqyly júrgizildi. Osynyń arqasynda 26,5 mlrd teńge mólsherinde búdjet qarajatyn únemdep qalýǵa jol ashyldy», – deıdi mınıstr.
Eljan Birtanov atap ótkendeı, únemdelgen qarajat naýqastanǵan 20 myń adamǵa dári-dármek preparattaryn alýǵa jumsalǵan. Qazirgi ýaqytta aqparattyq júıelerdi jetildirý, árbir pasıent boıynsha derbes dári-dármekterdi qoldaný monıtorıńi men qajettilikti anyqtaý jumysy júrgizilip jatyr. Bul qadam árbir adamnyń tegi boıynsha dári-dármekterdi satyp alýǵa, olardy dálme-dál taratýǵa, sonymen birge qaldyq preparattarǵa baqylaý jasaýǵa múmkindik beredi.
