Kópshilik taǵatsyzdana kútken «I am a singer Kazakhstan» telejobasynyń ekinshi maýsymynyń alǵashqy shyǵarylymy da kórermenge jol tartty. Joba uıymdastyrýshylary ýáde bergendeı, shoýdyń jarq-jurq etken sahnasy men onda shyrqalǵan ásem ánder bir-birimen úılesim taýyp, á degennen halyqty erekshe sezimge bóledi.
Júrek tolqytar sátter, erekshe tolǵanystar, ýaıym men qýanysh, tógilgen kóz jasy, jobadaǵy oryn úshin tartys birinshi shyǵarylymnan-aq bastalyp ketti. «I am a singer Kazakhstan» shoýynyń alǵashqy kezeńinde qazylar alqasy quramyndaǵy Maqpal Isabekova, Sáken Maıǵazıev, Elhan Ahmedov syndy belgili óner ıelerin jylatqan erekshe oqıǵa oryn aldy. Oǵan sebep bolǵan Almaty oblysy, Jarkent qalasynan kelgen Maqsat Dáýrenbekov esimdi úmitker edi. Maqsat sahnaǵa Maıkl Djeksonnyń áıgili «You are not alone» ánimen shyqty. Ózin jaı ǵana beıne operatormyn dep tanystyrǵan jas jigittiń daýsyndaǵy tebirenis, onyń júrekpen shyrqaǵan áni qazylar alqasyna erekshe áser etti. Oǵan qosa, Maqsat irikteý kezinde oryndaǵan Batyrhan Shúkenovtyń «Otan-Ana» ániniń bir shýmaǵyn shyrqap bergen sátte Maqpal Isabekova men janyndaǵy serikteri kóz jastaryn tıa almaı, jylap jiberdi. Ónerdegi úzeńgiles dostary, marqum Batyrhan Shúkenovtyń osy bir tamasha áni Maqsattyń oryndaýynda shynymen tabıǵı shyqqan edi.
Bul shoýǵa qandaı maqsatpen keldiń degen suraqqa Maqsat: «Men munda ózimdi kórsetý úshin emes, baǵymdy synaýǵa keldim. Ánshilikti kásip etpeımin. Biraq óner adamdaryna, olardyń ómirine qatty qyzyǵamyn, talanttaryna tabynamyn. Al bylaıǵa ýaqytta beıne operator retinde nápaqamdy taýyp júrmin», - dep jaýap berdi.
Ózderińiz biletindeı, «I am a singer Kazakhstan» saıysynyń erejesi boıynsha, zaldaǵy kórermenderdiń 90% daýsyna ıe bolǵan úmitker daýsyz kelesi kezeńge ótedi. Al 60 % daýys jınasa, olardyń ary qaraıǵy taǵdyryn sarapshy-qazylardyń pikiri sheshedi. Degenmen, saıystyń aty – saıys. Ókinishke qaraı, sarapshy qazylardy erekshe áserge bólegen Maqsat kelesi kezeńge ótý úshin kórermender tarapynan jetkilikti daýys jınaı almady.
Alǵash ret sahnaǵa shyǵyp, óziniń tabıǵı daýsymen, biregeı oryndaý mánerimen kádimgi kásibı ánshilerdi tańdaı qaqtyrǵan jas jigit qarsy aldynda otyrǵan óner ıelerine basyn ıip, «I am a singer Kazakhstan» shoýymen qosh aıtysty.
