Sońǵy on jylǵa jýyq ýaqytta elimizde terorızm men Sırıaǵa jıhadqa attanǵan qazaqtardyń máselesi ulttyq qaýipsizdikke qaýip tóndiretindeı dárejege jetken. Áleýmettik jelide qazaqstandyqtardy «qasıetti soǵysqa» shaqyrý beınejazbalary jıiledi. Jıhadshylardyń sózderine shúbá keltirmegen qazaqtar áıelderi men bala-shaǵasyn ertip Sırıadan biraq shyqty. Ózderin otqa aıdaǵan qazaqstandyqtar kóp uzamaı qatelikterin túsinip, elge qaıtýdy ańsap júr. Al olardyń Sırıada «qandaı jaǵdaıǵa tap bolǵandyǵyna qaramastan» ol azamattardyń quqyǵy men múddesin qorǵaý mınıstrliktiń mindeti.
Búgin Parlament májilisi otyrysynda bul másele qaıta qozǵalyp, QR SİM basshysynyń orynbasary Muhtar Tileýberdi Sırıa men Iraktyń soǵys alańdarynda júrgen qazaqstandyqtardy otanyna qaıtarý jumystarynyń júrgizilip jatqanyn ári soǵan asa nazar aýdarylǵanyn málimdedi.
«Sırıa men Irakta júrgen otandastarymyzdy izdeý jumystary oıdaǵydaı júrgizilip jatyr. Iordanıadaǵy elshiligimiz ben Lıvandaǵy bas konsýldyǵymyz bizdiń azamattarymyzdy izdeýmen aınalysýda. Sonymen qatar balalary Sırıada júrgen ata-analardan da suraýlar túsip jatyr. Sondyqtan osy máselege kóp kóńil bólýdemiz. SİM ǵana emes, arnaıy qyzmet, Qorǵanys mınıstrligi, İİM, TJK da osy iske qatysty jumyla kiristi», - dedi ol.
Aıtýynsha, otandastarymyzdy elge qaıtarý úshin arnaıy ushaq ta bólingen eken.
«Birinshiden, azamattarymyzdyń kóbi terorızmge qatysy bar-joǵyn anyqtaıtyn arnaıy tekserýden ótedi. Qatysy joqtar Qazaqstanǵa jiberiledi. Keıbir áıelder balalarymen júr. Olardyń balalary ata-anasynyń ruqsatymen Qazaqstanǵa qaıtyrylyp, anasy men ákesi operasıa aıaqtalǵansha sonda bolady», - dedi Tileýberdi.
Al «adasyp» Sırıaǵa attanǵandardyń ata-analary balalarynyń jazalanýyn qalaıdy. Tipti Muhtar Tileýberdi nemerelerin óz qoldaryna, ata-ana quqyǵynan aıyrýǵa deıin baratyn ájeler de jetkilikti ekenin aıtty.
