Búgin Almatyǵa arnaıy saparmen kelip, Prezıdenttiń bes áleýmettik bastamasynyń júzege asyrylý barysymen tanysqan «Nur Otan» partıasy Tóraǵasynyń Birinshi orynbasary osylaı dedi.
Sapar barysynda Máýlen Áshimbaev joǵary bilim berýdiń qoljetimdiligi men sapasyn arttyrý bastamasy boıynsha salynǵan jataqhanalarǵa bardy. Atap aıtqanda, ol S.Asfendıarov atyndaǵy Qazaq Ulttyq medısınalyq ýnıversıteti men Qazaqstan ınjenerlik-tehnologıalyq ýnıversıtetiniń jatahanalarynda bolyp, stýdentterge jasalǵan jaǵdaımen tanysty.
Jalpy Almatyda atalǵan bastama aıasynda osy jyldyń sońyna deıin 4 jańadan salynǵan jáne 1650 oryndyq qaıta jańǵyrtylǵan 1 jataqhana paıdalanýǵa berilmek. Odan bólek, 2300 orynǵa arnalǵan 3 jańa jataqhananyń qurylysy bastalady dep josparlanǵan.
Sondaı-aq Máýlen Áshimbaev «7-20-25» baǵdarlamasy boıynsha salynyp jatqan jańa turǵyn úı kesheniniń qurylys jumystarymen tanysyp, turǵyndarǵa jańa baspanalarynyń kiltin tabystaý saltanatyna qatysty. Osy rette Almaty qalasy boıynsha 2018 jyly 1,9 mln. sharshy metr baspana nemese 15,1 myń páter paıdalanýǵa berý josparlanǵanyn atap ótken jón.
– Búgin Elbasynyń bes áleýmettik bastamasy Almaty qalasynda nátıjeli júzege asyrylyp jatqanyna kýá boldyq. Munda jańadan salynǵan jataqhanalar sapaly ári jańa qondyrǵylarmen jabdyqtalǵan. «7-20-25» baǵdarlamasy boıynsha da shaharda júıeli jumys júrgizilýde. Úılerdiń sapasy da talaptarǵa saı. Sondyqtan Almaty qalasynda ár otbasyn baspanamen qamtýdy kózdeıtin bastama nátıjeli júzege asyrylýda deýge tolyq negiz bar. Osyndaı baǵdarlamalarǵa jastar kóbirek qatysýy kerek. Munyń barlyǵy Elbasy saıasatynyń jemisi. Búginde halyq bul bastamalardyń naqty nátıjesin kórip otyr. Aldaǵy ýaqytta da «Nur Otan» partıasy osy baǵyttaǵy óz jumystaryn qarqyndy jalǵastyrady, – dedi Máýlen Áshimbaev.
Sonymen qatar partıa Tóraǵasynyń Birinshi orynbasary shaǵyn nesıe berýdi kóbeıtý bastamasy boıynsha memleketten qarajat alyp, óz isin dóńgeletip otyrǵan kásipkerlermen kezdesti. Sondaı kásipkerlerdiń biri Dınara Qazıeva. Ol atalǵan bastama arqyly nesıe alyp, tis emhanasyn ashqan. Stomatologıaǵa anaıy barǵan partıa Tóraǵasynyń Birinshi orynbasary Elbasynyń bes áleýmettik bastamasy der kezinde qolǵa alynyp, halyqtyń jaǵdaıyn jaqsartýǵa ıgi septigin tıgizip jatqanyn aıtty.
