Búgin saıası tutqyn Muhtar Jákishevtiń anasy Raısa Jákishevanyń jerleý rásimi ótti dep jazady Qamshy.kz aqparat agenttigi. Muhtar Jákishev anasynyń qaıtys bolýyna baılanysty jerleý rásimine qatysýǵa ruqsat suraǵan bolatyn. Alaıda bılik buǵan qarsylyq bildirdi. Osy jaıtqa qatysty belsendiler feısbýk jelisi arqyly óz oıyn ishke búgip qalmaı, pikirin bildirip, qaıǵyly jaıtqa kóńil aıtty. Qoǵam belsendileriniń áleýmettik jelige jarıalaǵan jazbasyn Qamshy.kz aqparat agenttigi oqyrman nazaryna usynýdy jón kórdi.
Muhtar Jákishevtiń anasy qaıtys bolǵany belgili boldy. Anasy balasynyń da, óziniń de ómirin qurtqan júıeni qalaı qarǵaǵanyn kóz aldyma elestete de almaımyn.
Bılik tarapynan jasalǵan osyndaı masqara tyıym — bizdiń býyndaǵy kózge túse bilgen ókilge saıası turǵyda jasalǵan zábirdiń anyq kórinisi.
Prezıdentten kúnnen kúnge densaýlyǵy asqynyp bara jatqan Muhtar Jákishevti bosatýyn suraımyz!
Áıtpese bılik elimizdiń órkendeýine úles qosa alatyn talantty basqarýshyǵa qarsy jasalyp otyrǵan jeke bastyń, saıası turǵydaǵy qandy kektiń bar ekenin jasyra almaıdy.
Men Muhtar men onyń otbasy, týǵan-týysyna kóńil aıtamyn!
Saıası tutqyn Muhtar Jákishevtiń anasy qaıtys boldy. Al túrme ákimshiligi Muhtar Jákishevti anasyn sońǵy saparǵa shyǵaryp salýyna ruqsat bermegen. Men osy jaıtqa baılanysty bılikke bizdiń keńestik zamanda emes, ata-babanyń saltyn ustanyp, «O dúnıelik bolǵan adamdy máńgilik mekenine shyǵaryp salý – otbasynyń, aǵaıynnyń paryzy», -degen zańdylyqty ustanatyn halyq ekendigimizdi eskertkim keledi.
Muhtar Jákishev adam óltirgen qandy qol qylmysker emes. Oǵan qasyna jendetterdi jiberip bolsyn anasyn sońǵy saparǵa shyǵaryp salýyna múmkindik berý kerek. Múmkindik berilmegen jaǵdaıda, halyqtyń bul qarsylyqty ata-baba dástúrine qarsy shyǵý dep baǵalaǵannan basqa amaly qalmaıdy.
Júrek túkpirinde ádildiktiń ornap, Muhtar Jákishevti anasyn sońǵy ret kórýge ruqsat beredi degen senim men úmit oty tutanǵandaı bolyp edi. Bul zańda kodeks retinde de kórsetilgen. Túptep kelgende bul adamgershilik pen adamdyq qoı, quryp ketkir. Jazasyn óteýshiniń meıli myńdaǵan jendetpen birge bolsyn ómirdegi eń qymbat jan bolǵan anasymen qoshtasýynda turǵan ne bar?
Eger Jákishevti ózi jasaǵan qylmysqa bola jazalaǵan bolsa, ol jetkilikti deńgeıde zardap shekken azamat. Basqa da jemqor jáne ury shendi-shekpendiler túrmede qansha jyl otyrǵan edi? Kóp degende birneshe jyl, tipti birneshe aı túrmede otyryp emin-erkin bostandyqqa shyqqandar bar.
Jemqor, burynǵy «Qazınjınırıng» kompanıa tóraǵasynyń burynǵy orynbasary Qanat Sultanbekov 2 mlrd teńge tólep, bostandyqqa shyqty. Ol álgi aqshany qaıdan aldy? Qalaı tapty? Buǵan eshkim mán bermeıdi. Bostandyqqa shyǵarýǵa sheshim qabyldady, shyǵardy.
Al antımonopolıalyq komıtettiń burynǵy basshysy Murat Ospanov múldem túrmege otyrmady. Ol da aıyppulmen qutyldy. Bul sekildi mysaldardy uzaq ýaqyt sanamalap otyra berýge bolady.
Al Jákishev ne úshin túrmede otyr? Ol 9 jylyn onsyz da tar qapasta, lagerde ótkizip, densaýlyǵynan aıyrylyp, múgedekke aınaldy. Endi tipti anasymen qoshtasýyna da, sońǵy ret kórisýine de ruqsat bermedi. Ádildik qaıda? Jákishevti anasymen kezdesýine qarsy bolǵan adamdardyń adamgershiligi qaıda? Eger ol anasymen kezdese salsa, myna opasyz jalǵanda ne ózgerer edi?
Kremlge, reseılik bılikke qarańyzdarshy. Saıası rejımniń jaýy Mıhaıl Hodorkovskıı qandaı qylmys jasasa da, bılik sońǵy ret anasymen kezdesýine múmkindik berdi. Ol anasynyń myna ómirdegi sońǵy sátterinde qasynda boldy. Hodorkovskıı bul sátterdi eshqashan umytqan emes, únemi aıtyp otyratyn.
Al Jákishevtiń anasymen qoshtasýyna ruqsat berýge ne kedergi? Endi bılik oılanyp, Muhtar Jákishevke anasynyń jerleý rásimine barýǵa ruqsat etedi dep úmittenemin. Ol anasyn tiri kezinde kóre almady, eń bolmasa sońǵy saparǵa shyǵaryp salsyn.
Muxtar Jákishevtyń anasy qaıtypty. Aptaldaı azamaty túrmede qýaryp, solyp bara jatsa, qaı ananyń júregi shydasyn... Aıtýǵa sóz tappaı otyrmyn...
Muxtar Jákishevtyń otbasyna qaıǵyryp kóńil aıtamyn. Bul otbasynyń tragedıasyn, Muxtar keshken taǵdyrdy, anasy kórgen qasiretti eshkimniń basyna bermesin. Talaı taý tulǵamyzdy qoldan qulatyp, bala-shaǵasyn jylatqan júıege toqtam bolmaı tur.
Muxtar qorshaǵan ortaǵa qaýipti qylmysker emes edi. Anasymen sońǵy ret baquldasýǵa ruqsat etpegender, aqtyq saparǵa shyǵaryp salýǵa da múmkindik bermegen shyǵar... Borkemikpiz... Qazaq xalqyna qaıǵyryp kóńil aıtamyn...
Buǵan deıin keıbireýde kúmán bolsa, endi Muhtar Jákishevti anasymen qoshtasýǵa jibermegen júıe óziniń bet-perdesin tolyq ashty. Ne degen jaýyzdyq. Ómirin Qazaq atom óndirisin damytyp ony Reseıden táýelsiz etýge arnaǵan Muhtardaı azamatty ulyqtaý ornyna túrmede shiritip qoıý eshbir qısyn men adamgershilikke jatpaıtyny óz aldyna. Sondyqtan anasynan aırylǵan Muhtar men onyń týystaryna ǵana emes, búgingi ómir saltymen kelisken, namysy men bostandyqtary aıaqqa taptalǵan kúlli Qazaqqa qaıǵyra kóńil aıtamyn.
