Kúni keshe Altaınús portaly jarıalaǵan «Abaıdyń basy Óskemendegi kúl-qoqystyń arasynda jatyr» atty maqalany saıtymyzǵa biz de jarıalaǵan edik. Onda jýrnalıs Serik Qusanbaev kúl-qoqystyń arasynda shań basyp jatqan Abaıdyń keýde músini jaıly kúıinip jazǵan edi. Artynsha redaksıaǵa jaǵymdy jańalyq kelip jetken eken. Músindi qala ákimdigi satyp alatyn boldy. Súıinshi jańalyqty Serik Qusanbaevtyń ózi jetkizdi.

Qamshy.kz aqparat agenttigi

Tús qaıta uıaly telefonmen tildesken kishi Vladımır Samoılov álginde ǵana Óskemen qalasy ákiminiń resmı ókilderi kelip ketkendikterin, maqalaǵa arqaý bolǵan uly aqynnyń keýde músinin qala ákimdigi satyp alatyn bop keliskenderin jetkizdi. Daýysy túneý kúngideı emes, jarqyn-jarqyn estildi.

Jaqsy habardy ala sala Óskemen qalasy ákimdigindegi azamattarǵa qońyraý shalsaq, ras eken. Abaı atamyzdyń músininiń kúl-qoqysta jatqanyn estigen boıda qareketke kóshken shahar basshysy, ultjandy azamat Jaqsylyq Omardyń uıymdastyrýymen óskemendik qos kásipker Ilá Elfımov pen Madıar Barıev qoqysta qalǵan músindi satyp alatyn bolypty.

Endigi másele – ortamyzǵa oralǵan Abaı músininiń qashan, qaı jerde ornatylýynda. Qalalyq ákimdik ókilderi bul máseleniń de pysyqtalyp jatqandyǵyn aıtty. Sonymen qatar Jaqsylyq Omar músindi Abaıǵa uqsatyp, qaıta jóndeý kerektigin eskertipti. Oqyrmandarymyzǵa bul máseleniń «Altaınús» portaly men «Dıdar» gazetteriniń jiti nazarynda boltyndyǵyn eskertemiz.

Esterińizge sala keteıik,  19 qyrkúıek kúni saıtymyzda  óskemendik músinshi Vladımır Samoılovtyń aýlasyndaǵy kúl-qoqystyń arasynda Abaıdyń bústi jatqany týraly maqala jarıalanǵan bolatyn. Músinshiniń aıtýynsha, eskertkishke 2014 jyly tapsyrys berilip, keıin ony eshkim almaı qoıǵan. Samoılov bir sózinde bul keýde músindi jasaý úshin kezinde 500 myń teńgeniń shyǵyny shyqqandyǵyn, eger alam deýshi tabylsa, 300 myńǵa bere salatyndyǵyn jetkizgen.

Serik Qusanbaev, Altaınús