Jomart Ertaevtyń isine qatysty kúdikti dep tanylǵan Tatána Paktyń jubaıy Evgenıı Pak óziniń otbasyna Jomart Ertaevtyń qysym jasap, qorqytqanyn aıtty. Bul jaıynda Qamshy.kz aqparat agenttigi habarlaıdy.
100% aksıasy «Alma TV» kompanıasyna tıesili «Asset Invest» kompanıasynyń basshysy Evgenıı Pak búgin Almatyda tilshilermen baspasóz konferensıasyn ótkizip, otbasyna jasalǵan qysym jaıynda aıtyp berdi.
«2017 jyldyń qyrkúıeginde Jomart Ertaev meniń úıime óziniń qaýipsizdik qyzmetinen eki adamdy jiberip, týystarym men otbasymnyń, balalarymnyń kózinshe maǵan qoqan-loqy kórsetip, otbasyńmen birge baýyzdap tastaımyn dep qorqytqan bolatyn. Meniń uıaly telefonymda Jomart Ertaevpen sóılesken sm-habarlamalardyń bar ekenin bilip, ony urlap ketti. Ol habarlamalar quqyq qorǵaý qyzmetkerleriniń qolyna túsedi dep qoryqqan bolar. Sol úshin de eki adamyn jiberip, úıimizdiń berekesin qashyrdy. Úıde 11 jáne 12 jastaǵy eki balam bolatyn», - dep aıtty Evgenıı Pak. Ol bul jaǵdaı boıynsha polısıaǵa baryp aryz jazǵanyn aıtty.
Onyń aıtýynsha, 2017 jyldyń qyrkúıeginde Ertaev oǵan óziniń kompanıasyn jubaıynyń atyna aýystyrý týraly ótinish jasaǵan eken.
«Men ol kezde Máskeýde boldym, al áıelim Almatyda turatyn. Resmı túrde «Alma TV» kompanıasynyń basshysy Jomart Ertaev bolyp tabylady. Bul ótinishinde eshqandaı da kúdikti nárseni baıqamaǵandyqtan kelistim. Alaıda kelisimshart bolǵannan keıin bul kompanıanyń RBK bankine 30 mıllıardtan asa qomaqty qaryzy bar ekeni belgili boldy. Ertaev ony nesıe retinde alǵan eken. Áıelimdi quzyrly organdar túsinikteme berýge jıi shaqyratyn bolyp ketti. Ertaev qamqorlyq tanytqan bolyp, meniń áıelime qorǵaýshy jaldap berdi. Jomart Ertaev pen onyń jaldaǵan advokaty túsinikteme bergende bar shyndyqty aıtpaýǵa kóndirdi. Óıtken jaǵdaıda jubaıym Tatánanyń ústinen qylmystyq is qozǵalmaq eken. Ol kompanıany bólip tóleý sharty boıynsha satyp aldym dep aıtýy kerek bolatyn. Túsinikteme bergennen keıin tergeýshiler jubaıymdy qamaýǵa alyp ketti. Tatána tergeý abaqtasynda alty aı qamaýda jatty. Jomart Ertaev quzyrly organdardyń is-áreketteri zańsyz boldy dep sendirdi. Ol bizge kómektese almady. Sonymen qatar, BAQ-ta Tatánanyń atynan Elbasynyń atyna baǵyttalǵan hat jarıalanǵan bolatyn, alaıda bul hat týraly meniń jubaıym bilmedi de», - deıdi Evgenıı Pak.
Onyń aıtýynsha, Ertaev onyń áıelin qorǵaýdy múlde oılamaǵan da. Máskeýde júrip jábir kórgen adam sekildi keıip tanytypty.
«Ertaev óziniń kinásin moıyndap, jaýapkershilikti óz moınyna alýǵa batyly jetpedi, ol meniń áıelimniń artyna tyǵylyp, zańdy túrde jaýap berýden basyn alyp qashty. Onyń bul qylyǵyn baıqaǵan sátte Qazaqstanǵa oralýdy oıladym. Jolǵa shyqpas buryn Ertaevqa Qazaqstanǵa baryp, túsinikteme beretinimdi aıtqan edim. Ol meni bylaı da bylaı kóndirýge tyrysty. Máskeýge oralǵan boıda qamaýǵa alynyp, qysym kóretinimdi aıtyp qorqyta bastady», - dep kúıinedi ol.
Sonymen qatar, Evgenıı Pak ózine qysym jasalyp, amaldyń joǵynan Ertaevqa "qarsy túsinikteme bermeımin" degen qujattarǵa qol qoıdyryp alǵanyn aıtty. Ol qujatta jazylǵandardyń bári de negizsiz ekenin, sebebi ony qysym kórsetip, kúshtep qoıdyryp alǵanyn jetkizdi.
Evgenıı Paktyń sózinshe, Jomart Ertaev qazir Máskeýde úı qamaqta otyr jáne oǵan telefon qoldanýǵa tyıym salynǵan. Alaıda bul tyıymǵa qaramastan Ertaev ınternet pen telefondy emin-erkin qoldanyp júrgen kórinedi. Whatsapp jelisinde túrli toptar ashyp, ony ekstradısıalaý men qylmystyq qýdalaýyna baılanysty pikirtalastar uıymdastyrady eken.
Evgenıı Pak buryndary Jomart Ertaevpen dostyq qarym-qatynasta bolǵanyn aıtty. Sonymen qatar, olar 2009 jyly Almatydaǵy tergeý abaqtysynda tanysqandyǵyn da aıtyp ótti. Abaqtyda Jomart Ertaev Aláns banktyń qarjysyn urlady degen aıyppen otyrsa, Evgenıı Pak jalǵan bızneske aıyptalǵan eken.
Tatána Paktyń jubaıy óziniń Jomart Ertaevpen sóılesken habarlamalarynyń skrınshottaryn da kórsetti.
Esterińizge sala keteıik, Jomart Ertaev aǵymdaǵy jyldyń naýryz aıynda Máskeýde qolǵa túsken bolatyn. Keıinirek ony úı qamaqqa ornalastyrǵan.
Aıta ketetini, Ertaevqa qomaqty qarjyny jymqyrdy degen aıyppen halyqaralyq izdeý jarıalanǵan jáne de ony Reseıde turý quqyǵynan aıyrǵan bolatyn. Jomart Ertaevty qylmystyq qýdalaý isi áli de jalǵasýda.
