«I am a singer Kazakhstan» shoýynyń osy jolǵy irikteý bólimi qatysýshylardyń esinde máńgi saqtalatyn shyǵar. Óıtkeni olar bıyl Elhan Ahmedovtyń baıqaý qatysýshysyna jan daýsy shyǵyp aıqaılaǵanyn óz kózderimen kórdi. 

Sáken Maıǵazıev Elhandy ázildep Jırınovskıımen salystyrdy. Alaıda, Ahmedov myrzany da túsinýge bolady. Ol «I am a singer Kazakhstan» jobasyna qatysýshylar kil myqtydan tursa eken dep ýaıymdaǵany sonsha, tamaǵy qarlyqqansha aıqaılasa da, fınalǵa tek qana laıyqty ánshini ǵana ótkizýge bel býypty. Bul irikteý bóliminde qazylar alqasy ánshilerdiń kemshilikterin qaıta-qaıta betterine basty. Tipti keıbir juldyzdar sahnada turyp-aq «tájinen» aıyrylyp qaldy.

Elhan, ásirese, Semeıden kelgen 27 jastaǵy Eldar esimdi úmitkerge qatty shúılikti. Aldymen oǵan Maqpal Isabekova óz pikirin bildirip: «Siz bul ándi jańa ǵana jattap shyqqandaı oryndadyńyz», - dedi. Al Elhan bolsa: «Mýzykada shalajansarlyqqa jol joq! Sahnada olaı án salýǵa bolmaıdy. Daýysyń joǵary da, tómen de emes!» - dep, ashýyn tizgindeı almaı, jan daýsymen aıqaı saldy.

Alaıda, Eldar men Bishkekten kelgen Ularbek Nurmamatuly esimdi ánshige ata-analaryna degen erekshe qurmetteri men ystyq yqylastary úshin alǵys aıtý kerek. Olar osy shoýdan ozyp shyqsa, jeńisterin ózderin osy bir óner degen qıyn jolǵa baptap qosyp, árdaıym qoldaý bildirip otyrǵan ata-analaryna arnamaqshy eken. «Ata-anama úlken úı ápergim keledi», - dedi Eldar. «Qalaǵandarynyń bárin áperer edim», - dedi Ularbek. Eki ánshi de kelesi kezeńge óte almaǵanymen bul shoýdan úlken sabaq alyp, qatelikterin túsinip, óner jolynda taǵy bir satyǵa ósýge múmkindik aldy.

Sol sıaqty, 16 jastaǵy almatylyq Ásel de, Temirtaý turǵyny Tımýr da, oraldyq Azamat Amangeldiuly da bul joly fınalǵa ótpegenimen,  «I am a singer Kazakhstan» shoýynyń úlken sahnasyna shyǵyp, kóptegen tájirıbe jınaqtap qaıtty.

 Qazylar alqasynyń ishindegi eń meıirimdisi, eń sypaıysy Sáken Maıǵazıev bolyp shyqty. Ol áriptesteriniń bergen baǵasy men aıtqan synynyń tigisin jatqyzyp, qatysýshylarǵa taǵy bir múmkindik syılap, tipti bolmaǵan jaǵdaıda jyly lebizimen qoldaý kórsetip otyrdy. Bul joly ol shoýǵa daıyndalý úshin arnaıy Ońtústik Koreıada ótken sheberlik klasyna baryp, jarty jyl boıy daıyndalǵan 16 jastaǵy Ásel esimdi arýǵa óziniń oń pikirin bildirdi: «Shado, bıork syndy baǵyttar da bizde bolýy kerek. Al mýzykaǵa degen qurmet – bólek áńgime. Sol sebepti sizdi de, sizdiń shyǵarmashylyǵyńyzdy da erekshe qurmetteımin. Bolashaqta jolyńyz bolady dep oılaımyn». 

Al Azamat Amangeldiulyna Sáken baıqaýlarda úlken jaýapkershilik artatyn aýyr ánderdi oryndamaýǵa keńes berdi. «Qolyńnan kelmese, oryndama, - dedi ol. – Men muny 1996-1998 jyldardaǵy óz tájirıbemnen bilemin. Jaqsylap daıyndalǵanyń ne kerek, sahnaǵa shyǵyp, ımprovızasıa jasaımyn deısiń de súrinip-jyǵylasyń». 

Bul jolǵy irikteý týrynda «súrinip-jyǵylǵandar» kóp bolǵanymen, qazylar alqasy eńselerin túsirmeı, Dımash Qudaıbergenov syndy jasyndaı jarqyrap, Qazaqstandy búkil álemge tanytatyn jaýhardy izdeýden tanbaımyz dep otyr.