Búgin Túrkistan oblysynyń ákimi Janseıit Túımebaev jumys saparymen Saryaǵash aýdanyna bardy. Aldymen «Jibek joly» keden beketiniń jumysymen tanysqan óńir basshysy odan keıin Jibek joly aýyldyq okrýgindegi «Bes Juldyz» balabaqshasyna keldi. Jeke kásipker G.Gýlamovanyń ıeligindegi balabaqshaǵa 1,1 mlrd. teńge kóleminde ınvestısıa tartylǵan. Qazir 450 bala tárbıelenip jatyr. Alpys adam turaqty jumyspen qamtylǵan. Oblys ákimi balalarǵa bazarlyq usynyp, balabaqsha ujymynyń qadamyn oń baǵalady.
Odan keıin J.Túımebaev Qaplanbek aýyldyq okrýginde ornalasqan «Jabaı ata» sharýa qojalyǵynyń jylyjaı kesheninde boldy. Munda kókónis ósirýde ozyq tehnologıalar qoldanylǵan. Quny 1,8 mlrd. teńge bolatyn joba boıynsha 15 gektar jerge qyzanaq pen qıar egilgen. Sharýa qojalyǵynda 75 adam turaqty jumyspen qamtylǵan. Jumysshylarmen tildesken J.Túımebaev «Buryn joǵary tehnologıalar qoldanylǵan jylyjaılar shetelde ǵana bolýshy edi, qazir Saryaǵashta da bar. Oblystaǵy jylyjaılardyń 50 paıyzǵa jýyǵy osy aýdanda shoǵyrlanǵan. Bul jóninen Saryaǵash ózgelerge úlgi bola alady. Elbasymyz Túrkistan oblysynyń dıqandaryna búkil Qazaqstandy jemis-jıdek pen kókónispen tolyq qamtý jóninde tapsyrma berdi. Búginde Memleket basshysynyń tapsyrmasymen sharýalarǵa túrli jeńildikter jasalyp jatyr. Nátıjesinde buryn shetelden tasymaldanatyn jemister men kókónister ózimizde shyǵarylýda. Sondyqtan osy baǵytta jumysty kúsheıte beremiz. Memleket tarapynan qoldaý bolady» dedi.
Halyq tyǵyz ornalasqan Saryaǵashta sport salasyn damytý mańyzdy. Osyny eskergen jergilikti bılik Qaplanbek aýyl okrýginde «Qaplanbek» sport keshenin ashqan. Munda 90 bala karate, taekvondo, aýyr atletıka jáne shaǵyn fýtbolmen shuǵyldanady. Olardy 7 bapker baptaıdy. Sporttyń densaýlyq kepili ekenine toqtalǵan oblys ákimi munan soń Saryaǵash aýdandyq ortalyq aýrýhanasyna atbasyn burdy. Jańadan ornatylǵan kompúterlik tomografıanyń jumysymen tanysyp, tomografıa ortalyǵyn salanatty túrde ashyp berip, saryaǵashtyq dárigerlerge 3 avtokóliktiń kiltin tapsyrdy. Bul ıgilikti isterdiń bári Elbasynyń medısına salasyna jasaǵan qoldaýynyń tátıjesinde bolyp jatqanyn tilge tıek etken óńir basshysy aýrýhana ujymyna sáttilik tiledi. Zamanaýı qurylǵy arqyly bas mıdyń qan aınalymdary aýrýlaryn, isik jáne ishki qurylystaǵy aýytqýlar men súıek jaraqattaryn anyqtaıdy. Jumys sapary sońynda oblys ákimi Saryǵash aýdany, Darbaza aýyldyq okrýginde ornalasqan «Aı-Meıirim» balabaqshasynyń ashylý saltanatyna qatysty. Memleket pen jekemenshik áriptestigi aıasynda salynǵan balabaqshada 75 bala tárıbelenedi. Nysandy salýǵa jáne ashýǵa 178 mln. teńge ınvestısıa tartylǵan. Qazir bul mekemede 28 adam turaqty jumys istep júr. Balabaqshany ashyp bergen J.Qanseıituly memleket tarapynan bilim salasyna aıryqsha qamqorlyq kórsetilip jatqanyna toqtalyp, turǵyndardy qýanyshty oqıǵamen quttyqtady. Búginde Saryaǵash aýdanynda 203 balabaqsha jumys istep tur. Aldaǵy ýaqytta da mektepke deıingi bilim berý mekemeleriniń sany artady degen boljam bar.
