Baǵdarlama áleýmettik kásipkerlikpen aınalysamyn deýshilerge 1,5-3 mln teńge aralyǵynda 5 jylǵa paıyzsyz qaryz beredi. «Jarqyra» baǵdarlamasy 2019 jyly Mańǵystaý óńirin qamtyp, Aqtaý, Fort-SHevchenko qalalary men Baýtıno, Boranqul eldi mekenderinde iske asady dep josparlanǵan.
Baǵdarlamanyń aımaqtyq úılestirýshisi Asqar Sekerbaevtiń aıtýynsha, baǵdarlama Orta Azıany damytý qory men «Teńizshevroıl» JSHS-niń qarjylaı qoldaýymen júzege asyp keledi. Maqsaty — qoǵamnyń áleýmettik, ekonomıkalyq jáne ekologıalyq máselelerine turaqty kásipkerlik sheshimderdi usynýǵa baǵyttalǵan ınovasıalyq áleýmettik bastamalarǵa serpin berý.
«Bul joba óte tıimdi. Qazir usynylyp jatqan granttardyń ishinde eń joǵarǵy qarjy bolyp sanalady. Kóbine úlken kólemdegi qarjylar nesıege beriledi. Mańǵystaýlyqtarǵa qor qarajaty jańasha baǵytta kásip damytýǵa septigin tıgizetinine senim artamyn», — dedi Óńirlik kásipkerler palatasynyń dırektory Nurbek Qarasaev.
Bul baǵdarlama 2016-2018 jyldar aralyǵynda Atyraý qalasynda júzege asty. Ótken jyldyń ózinde 7 áleýmettik-kásipkerlik 62 myń dollardan astam qarjy bólingen eken.
«Jarqyra» baǵdarlamasynyń bir ereksheligi — qatysýshylardyń jasyna shekteý qoıylmaýy. Baǵdarlama eki kezeńnen turady jáne úırený talaptary qarapaıym. Birinshi kezeń – áleýmettik ıdeıalardy irikteý, ekinshi kezeń- qatysýshylardy tanystyrý, semınar men dárister oqý. Sondaı-aq taǵylymdamadan ótip, keńes berilip, bıznes-jobalaryn qorǵaý.
mangystaumedia.kz málimetinshe, baǵdarlama arqyly áleýmettik kásipkerler qordan jyl saıyn qarjylaı qoldaý alýyna bolady. «Jarqyra» mynadaı baǵyttar boıynsha jobalardy qoldaıdy:
*Balalar men jastar
*Densaýlyq saqtaý
*Bilim berý Halyq dástúrlerin jandandyrý
*Ekologıa Sport Mádenıet jáne óner
*Osal adamdarǵa qoldaý kórsetý: jalǵyz, múgedekter, qarttar, oralmandar jáne t.b.
Áleýmettik kásipkerlik — qoǵamnyń ózekti máselelerin ınovasıalyq jolmen sheshýge kómektesetin áleýmettik mısıasy bar bıznes. Sondyqtan da bul baǵdarlama kópshiliktiń qyzyǵýshylyǵyn týǵyzyp otyr. Baǵdarlamany júıeli júrgizý úshin Mańǵystaý oblysy kásipkerler palatasy men Eýrazıa Orta Azıa qory arasynda túsinistik jónindegi memorandýmǵa qol qoıyldy.
Aıta keteıik, osy baǵyttaǵy jumystar 23 qazan Fort-SHevchenko qalasy, Baýtıno eldimekeni, 24-25 qazan Aqtaý qalasy, 29 qazan Boranqul aýylynda bastalady.
