Kezdesý barysynda taraptar eki memlekettiń sıfrlandyrý jáne ınovasıalyq tehnologıalar salasyndaǵy yntymaqtastyǵyn nyǵaıtý perspektıvalaryn talqylady, sondaı-aq saýda-ekonomıka qarym-qatynastaryn damytý máseleleri jóninde pikir almasty, dep jazady Qamshy.kz aqparat agenttigi Aqordaǵa silteme jasap.

Memleket basshysy «Astana Hab» İT-startaptar halyqaralyq tehnologıalyq parkiniń ashylý rásimine qatysqany úshin Estonıa Respýblıkasynyń Premer-Mınıstrine rızashylyq bildirdi.

Qazaqstan Prezıdenti Estonıanyń sıfrlyq tehnologıalar salasyndaǵy tájirıbesi mol ekenin atap ótti.

Nursultan Nazarbaev eki el arasyndaǵy saýda baılanystaryn nyǵaıtý qajettigin aıtyp, ekonomıkalyq yntymaqtastyqty damytýdyń basym baǵyttaryna toqtaldy. Memleket basshysy elimizde iske asyrylyp jatqan ınfraqurylymdyq baǵdarlamalar men solardyń aıasynda boı kóterip kele jatqan nysandar jáne kólik-tranzıt áleýetin arttyrý jónindegi jobalardyń nátıjeleri týraly aıtty.

Sonymen qatar, Memleket basshysy qaıta óńdeý jáne agrarlyq ónerkásip, farmasevtıka salalarynda jáne ekonomıkanyń basqa da sektorlarynda yntymaqtastyqty bir jolǵa qoıýdyń mańyzdy ekenin atap ótti.

Estonıa Respýblıkasynyń Premer-Mınıstri qonaqjaılyq kórsetkeni úshin Qazaqstan Prezıdentine alǵys aıtyp, óziniń Astanaǵa alǵashqy saparynan alǵan áserin ortaǵa saldy.

– Keshe Premer-Mınıstr Baqytjan Saǵyntaevpen syndarly kelissóz júrgizdik. Men Qazaqstanǵa alǵash ret kelip otyrmyn. Astananyń ınfraqurylymdyq nysandaryna qarap, elderińizdiń qalaı damyp kele jatqanyn kórýge bolady, – dedi Iý.Ratas.

Estonıa Respýblıkasynyń Premer-Mınıstri sıfrlandyrý jáne kólik-logıstıka salalarynda birlesken jobalardy iske asyrýǵa, sondaı-aq ınvestısıalyq yntymaqtastyqty keńeıtýge múddelilik tanytty.