Panfılov aýdanynda «Meıirim kerýeni» uıymdastyryldy dep jazady Qamshy.kz aqparat agenttigi. Atalmysh sharany atalmysh aýdannyń İsker áıelder keńesi alǵash ret keń kólemde uıymdastyrǵan.
Úsh kún ishinde bıznes-hanymdar aýdandaǵy 13 aýyldyq okrýgti aralap, az qamtylǵan 71 úıge azyq-túlik sebetterin syılady. Onda jergilikti áıel-kásipkerlerdiń qarajatyna eń qajetti degen taýarlar satyp alynǵan.
Qaıyrymdylyq sharasyna Kásipkerler palatasynyń fılıaly men kólikpen qamtamasyz etken aýdandyq ákimdik qoldady. Árbir sebet óziniń mekenjaıy boıynsha jetkizildi. Jumyspen qamtý jáne áleýmettik baǵdarlamalar bólimi uıymdastyrýshylarǵa kómekke zárý azamattardyń tizimin usynǵan.
Bul İsker áıelder keńesiniń alǵashqy demeýshiligi emes. Qyrkúıek aıynyń basynda «Mektepke jol» respýblıkalyq aksıasyna qatysyp, oqýshylardy mektep quraldarymen qamtamasyz etken bolatyn. «Meıirim avtokerýeni» ıgi dástúrdiń jalǵasy atandy.
«Keń kólemde, barlyq aýyldyq okrýgterdi aralap kómek kórsetýimiz birinshi ret. Meniń oıymsha, buny kómek emes, adamdardyń jaı ǵana kóńilin suraý áreketi dep baǵalaý kerek sıaqty. Sebebi, otbasylary ókilderimen tildeskimiz keldi. Keı jerde keńesimizben de bólistik», - deıdi Panfılov aýdany İsker áıelder keńesiniń tóraıymy, «Irada Balyk» JSHS dırektory Sýrıam Izımova.
Penjim aýyldyq okrýgindegi Ǵalıa Dárkembaevanyń otbasy azyq-túlik sebetin alǵan januıalardyń biri. Segiz balanyń anasy óziniń jasy men kishkentaı balalarynyń bolýy sebepti úıde otyr. Úlken otbasyny joldasy ǵana asyrap keledi.
«Otasqanymyzǵa 30 jyl. Kórip otyrǵandaryńyzdaı januıamyz úlken, biraq eshqashan muńaıǵan emespin. Kúıeýimniń jumysy turaqty emes, keıde aptalap jumysqa shyqpaıdy. Sol ýaqytta qatty qınalyp ketemiz», - deıdi Ǵalıa Dárkembaeva.
Aıymbıbi Ábıjanova da kópbalaly ana. Turmysy tómendigine baılanysty otbasy únemi únemdep júrýge májbúr. Járdemaqy men balalarynyń aılyǵy shańyraqqa jetpeıdi. Aıtýynsha, İsker áıelder keńesiniń syılaǵan sebeti eki aptaǵa jetýi tıis.
«Jaqsy istiń bastamashysy bolǵan azamattarǵa shyn júreten alǵysymdy aıtamyn. Kórsetilgen kómekke rızamyn. Aınalamyzda jaqsy adamdar baryna, nazarda júrgenimizge raqmet!», - deıdi ol.
Panfılov aýdany İsker áıelder keńesiniń tóraıymy Sýrıam Izımovanyń aıtýynsha, áıel-kásipkerler árbir aýyldyq okrýgterde áleýmettik jaǵynan az qamtylǵan birneshe otbasylardy qol astyna alyp, jyl boıy turaqty kómek kórsetip turady.
«Qazir kásipkerler áleýmettik jaýapkershiligin joǵarylatýǵa tyrysyp keledi. Qalyptastyrý kezeńinen ótken soń, kez kelgen kásipker qorshaǵan ortasy týraly oılap, óziniń múkindikterine qaraı, qaıyrymdylyq jobalaryna qatysýy mańyzdy. Qarabaıyr bolyp ketse de aıtaıyn: jaqsylyqty kóp jasaýymyz kerek. Sol sebepti bıznes ókilderin eń aldymen týǵan aýylynan bastap, sol jerde kómekke zárý azamattardy qoldaýǵa shaqyramyz. Erteńgi kúni bul isimizdi jalǵaýshy jastarǵa úlgi bolýy kerek», - deıdi Sýrıam Izımova.
Avtokerýenniń uıymdastyrýshylary jeltoqsan aıynda aýdan aýmaǵyn taǵy bir márte aralaýdy jospalap otyr. Al aldaǵy qarashada isker áıelder az qamtylǵan balalardy jyly kıimdermen qamtamasyz etedi.
