Almaty qalasy Túrkisib aýdanynda eski úıdi súrý baǵdarlamasy boıynsha birneshe josparlar iske asyryldy dep jazady Qamshy.kz aqparat agenttigi. Bul týraly aýdan ákimi málimdegen bolatyn. Almaty qalasyndaǵy eski úılerdiń kóbisi Túrkisib aýdanynda ornalasqan. Eki qabatty 16 úı súrilse, turǵyndarǵa paıdalanýǵa beriletin baspana sany 4 esege kóbeıedi eken.Al «Óńirlerdi damytý – 2020» baǵdarlamasy boıynsha «Jas qanat» yqshamaýdanynda 47 turǵyn úı boı kóterip, turǵyndardyń tilegin oryndady. Bıylǵy jyldyń sońyna deıin 90 otbasy jańa páterde qonys toıyn toılaıdy.
«Óńirlerdi damytý – 2020» baǵdarlamasyn iske asyrý úshin aýdan negizgi 4 aımaqqa bólingen. Aldaǵy ýaqytta belgilengen jospar boıynsha súrý men qurylys jumystary kezeń-kezeńimen, saty-satysymen júrgizilip otyrady. Bul jumystardyń alǵashqysy aldaǵy jyldyń birinshi toqsanynda bastalady dep josparanýda. Qazirgi ýaqytta kezekte 16 eski úıdi súrý josparlanyp tur. Al olardyń ornyna 800 páterdi qamtıtyndaı 40 jańa úı boı kóteretin bolady.
Almaty qalasy Túrkisib aýdanynyń ákimi Pavel Kýlagınniń aıtýy boıynsha, barlyq sharalar kelisim arqyly nemese sot arqyly sheshiledi. Alaıda eń birinshi turǵyndarmen arnaıy kelisim júrgiziledi. Eger turǵyndar óz erkimen kelispegen jaǵdaıda sot arqyly másele sheshilip, eski úıler súriletin bolady.
«Qazir tıisti jumystar istelip jatyr. Joba bar. Meniń oıymsha, keler jyldyń alǵashqy toqsanynda jańa úıdiń qurylysy bastalady», deıdi Pavel Kýlagın.
Aýdan ákimi Túrkisib aýdanyndaǵy negizgi máselelerdiń kóbisi jańadan qosylǵan aýmaqtarda ekenin tilge tıek etti. Qazirgi ýaqytta jaryqtandyrý, gaz júrgizý, ınfraqurylymdy jaqsartý, zańsyz qurylysty joıý sekildi máseleler óz sheshimin taýyp jatyr. Qazirdiń ózinde 370 kóshege sham ornatylyp, 3 jerasty ótkeli turǵyndarǵa qyzmet kórsetýge jarap tur. «Almaty-1» temir jol vokzaly aldyndaǵy alań da kóriktendirildi. Eki aptadan keıin qoǵamdyq kólikterge arnalyp aıaldamalar qoıylatyn bolady. Al aldaǵy 2019 jyly aýdan tolyqtaı derlik kógildir otynmen qamtylmaq.
«Jeke turǵyn úı sektorynda birneshe úıler kógildir otynmen qamtylýy tıis. Olardyń deni magıstraldy jelilerden alshaq ornalasqan. Olardy bıyl qamtyp úlgermeımiz. Biraq keler jyldyń birinshi jartysynda aýdandaǵy barlyq úılerge gaz júrgiziledi», – dedi Pavel Kýlagın.
Aýdanda jańa balabaqsha, múgedekterge arnalǵan psıhonevrologıalyq ınternat úıi jáne medısınalyq mekemeler salynyp jatyr. Aýlalardy kóriktendirý men onyń qaýipsizdigine de den qoıylýda. Qazir 4000 beınebaqylaý kameralary ornatylǵan.
Jalpy 9 aıdyń kórsetkishi boıynsha aýdanda barlyq sala boıynsha oń nátıje baıqalyp, aýdannyń jaqsaryp qalǵanyn kórýge bolady. Osy ýaqyt ishinde 30 mıllıard teńgege jýyq ınvestısıa tartylyp, shaǵyn jáne orta bıznes mekemeleri men kompanıalarynyń sany 102 paıyzǵa artqan. Buǵan qatysty 7 myńǵa jýyq kásipker jaqsy tabys taýyp, paıda kórip otyr. 2018 jyldyń basynan beri 3 myńǵa jýyq jańa jumys orny ashylǵan. Sonymen birge jaqynda áýejaı termınaly salynatyn bolsa jumys oryndarynyń sany taǵy da artatyn bolady.
Aýdan ákimi Pavel Kýlagınniń sózine sensek, qazirgi ýaqytta áýejaı termınalynyń syzbalyq jumystaryna baılanysty halyqaralyq konkýrs jarıalanǵan.
«Jaqyn arada siz ben biz sol jobamen tanysamyz dep oılaımyn. Kópshilik nazaryna usynylady. Ázirlenip jatqan joba boıynsha qazirgi áýejaıdyń oń jaǵynda bos aýmaq tańdalyp, tıisti jumystar júrgizilip jatyr», – dedi Almaty qalasy Túrksib aýdanynyń ákimi.
Sultan Ábishuly
