Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń ótkenimizge oralyp, rýhanı kókjıegimizdi keńeıtýde róli joǵary. Sondaı-aq, bul baǵdarlama elimizde kóptegen aýqymdy jobalardyń bastaý alýyna túrtki boldy. Solardyń biri áli de kóp eshkim estip-bile qoımaǵan – «Qazaqtaný» jobasy.

Elimizdegi 130-dan astam ult pen ulys ókilderiniń basyn biriktirgen Qazaqstan halqy Assambleıasy jurtshylyqty birtutastyq pen aýyzbirshilikke úndep, ulttyq qundylyqty nasıhattap, urpaq boıyna darytýda talaı jobalardyń uıytqysy bola bildi. «Qazaqtaný» jobasynyń ıdeıasy da osy Qazaqstan halqy Assambleıasynyń XXVI sesıasynda kóterilgen bolatyn. Negizgi maqsat – «Rýhanı jańǵyrý» baǵdarlamasyn júzege asyrý aıasynda barsha qazaqstandyqtyń ortaq mádenı kody, birtutas qundylyqtary men jalpyulttyq tarıhı sanasy negizinde halyqtyń birligin nyǵaıtý. Sonymen qatar, etnostar arasynda qazaq halqynyń tarıhyn, dástúrlerin, gýmanıtarlyq jáne adamgershilik prınsıpterin dáripteýge basymdyq berý.

Elimizdiń zıaly qaýym ókilderi «Qazaqtaný» jobasynyń ult tutastyǵyna, el birligine aparatyn qadam ekenin aıtýda. Solardyń biri «Qasıetti Qazaqstan» ǵylymı-zertteý ortalyǵynyń basshysy, tarıh ǵylymdarynyń kandıdaty Berik Ábdiǵalı bul jobanyń mán-maqsaty jaıly pikirin bildirgen.

«Qazaqstandaǵy turaqtylyq memleket quraýshy ultqa, ıaǵnı, qazaqqa tikeleı baılanysty. Óıtkeni, búginde basqa ulttar qazaqty tereń tanyp, tilin bilse, qazaq dúnıetanymyn, tarıhyn oqyp biletin bolsa, ol halyqty biriktiredi. Bizdiń qoǵamdaǵy qarama-qaıshylyqtyń kóbisi eń birinshi qazaq tili men tarıhyn, qazaqtyń minezi men sana-sezimin, mádenıetin bilmegendikten týyndap jatady. Shyn máninde biz memleket qurýshy ult, halyqtyń kópshiligi bolǵandyqtan, ultymyzdyń asylyn jurtqa tanytýdyń mańyzy joǵary. Sondyqtan, «Qazaqtaný» jobasy – ózge ult ókilderi men qazaqtyń arasyn jaqyndatý, bir ultty keńirek taný taqyrybyndaǵy kólemdi jumys. Árıne, Qazaqstandaǵy etnostar men qazaqtar ózara tanysyp, bir-biriniń tarıhta júrip ótken jolyna qanyǵyp, tatýlyq pen birlikte ómir súrse, elde únemi turaqtylyq bolmaq. Bir-birin taný, túsinýge umtylýdyń ózi halyqty jaqyndastyrady. Qazaqtyń ulttyq qundylyǵyn, dástúrin nasıhattaý, kıeli jerler arqyly qazaqty tanýǵa qyzyǵýshylyq týdyrý – «Qazaqtaný» jobasynyń negizi. Sondyqtan da biz osy jobany tolyqtaı qoldap otyrmyz», – deıdi ol.

Qazaqstan halqy Assambleıasy Tóraǵasynyń orynbasary, Leonıd Prokopenko da aımaqqa sapary barysynda bul jobany bıylǵy jyldyń tyń jańalyǵynyń biri retinde tanystyrǵan bolatyn.

Joba aıasynda jer-jerde lektorııler men semınarlar, forýmdar uıymdastyrylmaq. Máselen, memlekettik tildi jedeldete oqytýǵa arnalǵan qazaq tiliniń qalyptasý tarıhy men erekshelikteri boıynsha dárister kýrsyn ótkizý josparlanǵan. Assambleıanyń «Jańǵyrý joly» respýblıkalyq jastar qozǵalysy aıasynda qazaq mádenıetiniń, ǵylymy men óneriniń jarqyn ókilderi týraly sabaqtar, taqyryptyq synyp saǵattaryn ótkizý de kózdelgen. Dostyq úıleri janynan «Muragerler-saqtaýshylar-jasampazdar» baǵdarlamasyn ázirleý, «Uly dala eliniń kıeli muralary» tarıhı-ekologıalyq aksıasyn júzege asyrý da joba negizinde atqarylar istiń biri.

«Qoǵamdyq kelisim» komýnaldyq memlekettik mekemesi basshysynyń orynbasary Lázzat Jylqyshıevanyń aıtýynsha, joba aıasyndaǵy is-sharalar aımaqta qarasha aıynan bastaý almaq.

«Joba birneshe taqyryptyq baǵyttarǵa bólingen. Olar ótken tarıh pen búgingi qundylyqtardy, ulttyq salt-dástúrdi nasıhattaýǵa, kıeli jerler men tildiń qadir-qasıetin uǵynýǵa  negizdelgen», – deıdi ol.

Atalǵan jobaǵa saı elimizdiń qasıetti jerlerin aralaý men lektorııler ótkizý josparlanǵan. Bul – ýaqytsha naýqan  emes. Sondyqtan, qazaqtyń dástúrin, mádenıetin ózgelerge tanytyp, tildi nasıhattaý syndy jumystyń barlyǵyn keshendi túrde júzege asyrý kózdelgen. Elimizde bir jaǵynan memlekettik til saıasaty oryndalyp jatsa, bul joba «Rýhanı jańǵyrý» baǵdarlamasy aıasynda dástúrimizdi dáriptep, ulttar arasyndaǵy baılanysty da  nyǵaıta túspek.