Atyraý oblysy Jylyoı aýdanyna qarasty Shoqpartoǵaı aýylynda 2016 jyly paıdalanýǵa berilgen 605 mıllıon teńgelik balabaqsha súriletin boldy, - dep habarlaıdy  Qamshy.kz Aq Jaıyq basylymyna silteme jasap.

El ıgiligi úshin salynǵan «Baldáýren» balabaqshasy jańa bola tura, irgetasy shógip, qabyrǵalary qaqyrap, búginde apatty kúıge túsken. Biraq osy jaǵdaıǵa jaýapty birde-bir laýazymdy tulǵa jaýapqa tartylmaǵan. Qurylysqa bólingen qomaqty qarjynyń taǵdyryna ákimdik te, merdiger de naqty túsinikteme bermeı otyr.

160 oryndyq bul balabaqsha «Teńizshevroıl» kompanıasynyń qarjylaı qoldaýymen, «Igilik» baǵdarlamasy aıasynda salynǵan bolatyn. Alaıda nysan paıdalanýǵa berilgen soń kóp uzamaı-aq qabyrǵalardan jaryqtar baıqala bastaǵan. Jobany júzege asyrǵan merdiger – «AtyraýRemStroıMontaj» JSHS birneshe ret «jóndeý jumystaryn» júrgizgenimen, nátıje shyqpady. 2022 jyly ǵımarat resmı túrde apatty dep tanylyp, jabyldy. Sodan beri úsh jyl boıy qańyrap bos tur.

Eń soraqysy — bul jaǵdaıǵa ne sebep bolǵany áli kúnge deıin belgisiz. Qurylys kezinde jiberilgen óreskel qatelikter me, álde durys tańdalmaǵan jer telimi me – eshqandaı naqty qorytyndy joq. Tergeý de, saraptama da – qaǵaz júzinde ǵana. Qoǵamnyń suraǵyna: "605 mıllıon teńge qaıda ketti?" degenge eshkim naqty jaýap bere almaı otyr. Al qarjy – tolyq ıgerilgen.

«Balabaqsha jabylǵanyna úsh jyl boldy. Qazir 20 bala Qulsaryǵa tasymaldansa, 82 bala mektep janyndaǵy shaǵyn toptarǵa ornalasqan. Kóp ata-ana balasyn úıde ustap otyr. Suranys joǵary», – deıdi aýdandyq bilim bóliminiń basshysynyń mindetin atqarýshy Gúljansara Tańatarova.

Aýdan ákiminiń orynbasary Gúlnafıs Aıshýaqova balabaqshanyń tehnıkalyq saraptamadan ótkenin, jáne nátıjesinde ony buzý týraly sheshim qabyldanǵanyn málimdedi.

Bir qyzyǵy, dál sol aýylda taǵy bir balabaqsha qurylysy bastalyp ketken. Taǵy da «Teńizshevroıl» qarjysy, taǵy da ákimdik baqylaýy. Bul joly 280 oryndyq. Qurylysy kelesi jyly aıaqtalady dep josparlanyp otyr. Biraq bul jobanyń taǵdyry da burynǵy "Baldáýrenniń" kúıin keshpesine kim kepil?

Bir kezderi bolashaqtyń balalary úshin dep salynǵan nysan endi súrilýge bet aldy. Al jaýaptylar – tasada. Halyqtyń senimi men salyq tóleýshiniń aqshasy taǵy da dalaǵa ketti.