Iran Izraılge qatysty taǵy bir qatań málimdeme jasap, Haıfa qalasynyń belgili bir aımaǵynda turatyn azamattarǵa aýmaqty shuǵyl túrde tastap ketýge keńes berdi. Bul — sońǵy kúnderdegi ekinshi osyndaı eskertý, jáne aımaqtaǵy shıelenis aıasynda jaǵdaı ýshyǵa túskenin bildiredi.

Irannyń SNN telearnasy taratqan aqparatqa sáıkes, Haıfadaǵy naqty koordınattar kórsetilgen aýmaqtaǵy turǵyndarǵa shuǵyl úndeý jasaldy. Habarlamada sol aýdanda turatyndarǵa qaýip tónip turǵany eskertilip, ómirlerin saqtap qalý úshin dereý evakýasıalaný qajettigi aıtyldy.

Málimdemege karta qosa berilip, yqtımal qater aımaǵy naqty kórsetilgen. Bul – sońǵy birneshe kún ishinde Iran tarapynan jasalǵan osyndaı alǵashqy eskertý emes. Buǵan deıin Iran Qarýly kúshteri Bas shtabynyń bastyǵy Abdýlrahım Mýsavı de Tel-Avıv pen Haıfa turǵyndaryna qalalardan ketýge keńes bergen bolatyn.

«Halyq Netanáhýdyń soǵysqumar saıasatynyń qurbany bolmaýy kerek», – dep málimdedi Mýsavı. Alaıda, Iran tarapynan jasalǵan bul qatań eskertýlerge qaramastan, ázirge olardyń eshqaısysy naqty áskerı is-qımyldarmen rastalǵan joq.