Sh.Sarıev atyndaǵy kórkemsýret jáne qoldanbaly-sándik óner mýzeıinde qyrkúıek aıynda atyraýlyqtarǵa esigin aıqara ashqan «N.Nazarbaev: dáýir, tulǵa, qoǵam» kóshpeli qor kórmesin «Atyraý-Aqparat» medıa seriktestiginiń  ujymy da arnaıy baryp tamashalady. Memleket basshysy Nursultan Nazarbaevtyń joǵary memlekettik nagradalarynyń biregeı jınaǵy, memleket basshylary jáne otandyq avtorlar tartý etken qoltańbasy bar kitaptar men Elbasynyń shet tilderge aýdarylǵan eńbekterin tamashalaǵan ujym qyzmetkerleri, kórmeden kóp oı túıip, erekshe áser alyp qaıtty. 

Elbasy kitaphanasynyń arhıv, kitaphana, mýzeı qorlarynyń jádigerleri usynylǵan kórme tórt negizgi bólimnen turady. «Elbasy joly» bólimi Qazaqstan Respýblıkasy Tuńǵysh Prezıdenti – Elbasy N.Á.Nazarbaevtyń ómir kezeńderinen syr shertedi. Munda rýhanı sananyń damýy men dáýir mazmunyn aıshyqtaıtyn tarıhı úderister men oqıǵalar sıpattalady. Al, «Elbasy fenomeni» bóliminde elimizdiń negizin qalaǵan, jahandyq keńistikte turaqtylyq pen qaýipsizdiktiń jańa ıdeıalaryn engizgen Elbasynyń memlekettik qurylym tujyrymdamasynyń qalyptasýy men damý tarıhy kórinis tapqan. Atalǵan bólimde «Atyraý-Aqparat» medıaholdıng qyzmetkerleri Semeı ıadrolyq polıgonynyń jabylýynan bastap, memleket astanasyn aýystyrý ıdeıasyn júzege asyrýǵa deıingi tarıhı mańyzy bar sheshimder, bastamalarmen jiti tanysty.

Álemdik deńgeıdegi saıasatker, Memleket basshysy Nursultan Nazarbaevtyń bıik bedeli men asqaq abyroıynyń jemisi retinde elimizdiń qarqyndy syrtqy saıasatyn aıryqsha atap aıtýǵa bolady. Bul jaıynda «Álem tanyǵan Elbasy» bóliminde kórsetiledi. Munda elimizdiń kópvektorly syrtqy saıasatyn aıqyndaıtyn dıplomatıalyq tartý-taralǵylar, jeke jazbalar, arhıvtik materıaldar men  Memleket basshysynyń eren eńbegin tanyǵan sheteldik memleket jáne úkimet basshylarynyń jeke qurmeti retinde berilgen kádesyılar da bar.

Ujym músheleri «Elbasy mártebesi – el mártebesi» bóliminen Memleket basshysynyń jáne Qazaqstan halqynyń jahandyq úderisterdiń turaqtylyǵy men órkendeýine qosqan úlesi úshin tabys etilgen Elbasynyń joǵary memlekettik marapattaryn da asa qyzyǵýshylyqpen tamashalady.

«Balabaqsha tárbıelenýshilerinen bastap, oqýshylar men stýdent jastarǵa deıin túrli sanattaǵy kelýshilerge arnalǵan ekskýrsıalar kórmeniń barlyq jumys kúnderi jumys jasaıdy. Jádigerlerdi búginge deıin otyz myńǵa jýyq adam kelip tamashalady», –  deıdi ekskýrsıa júrgizýshisi Dınara Esqazıeva.

Qyzmetkerler Elbasynyń táýelsiz Qazaqstannyń tarıhı ómirindegi róline atalǵan kórme arqyly taǵy bir márte kóz jetkizgendeı boldy. Ondaǵy qundy jádigerler Memleket basshysynyń balalyq shaǵy men búgingi bıigi týraly syr shertip qana qoımaı, el damýynyń aıqyn bet-beınesin ańǵartyp turǵandaı.

– Elbasy men el tarıhy – egiz uǵym. Búgin biz kórmeni tamashalaı otyryp, sony aıqyn ańǵarǵandaımyz. Sondyqtan, mýzeıden kóshpeli elimizdiń tutas tarıhyna kýá boldyq. Qundy jádigerlermen tanysyp, erekshe áserge bólendik. Ásirese, Elbasymyzdyń syn saǵattarda qol qoıǵan eldiń taǵdyryn sheshýdegi basty ról atqarǵan qujattardyń túpnusqasy, kóptegen foto jáne vıdeo materıaldaryn erekshe yqylaspen tamashaladyq, - dedi oblystyq «Prıkaspııskaıa komýna» gazetiniń sholýshysy Qaırat Sataev.

– Tuńǵysh Prezıdent mýzeı qorynda saqtalǵan jádigerlerdiń barlyǵy – bizdiń táýelsizdigimizdiń tarıhı deregi. Ásirese, Ult Kóshbasshysynyń shetelderge issapar barysynda jazǵan qoljazbalary, mańyzdy sheshim qabyldar sáttegi oramdy oılary ­– búgingi urpaqqa qundy málimet ekeni daýsyz. Bilgenimizdeı, mýzeıdegi 11 myńnan astam jádiger – Elbasynyń jeke zattary. Kóshpeli qor kórmesi sol baılyǵymyzdy halyqqa tanystyryp, jurtshylyq arasynda nasıhattaýǵa oń septigin tıgizýde, - dep aıtty  oblystyq «Atyraý» gazetiniń bólim meńgerýshisi Aıbópe Sabyrova.

– Elordamyzǵa barýǵa barlyq adamnyń múmkindigi bola bermeıdi, sol sebepti, kórmeniń shalǵaı aımaqtarǵa shyǵyp, qundy jádigerlerdiń tanystyrylýy biz sekildi jas urpaq úshin mańyzdy. Biz kórgen jádigerlerdiń bári mańyzdy, qundy málimet, derekter. Kórmeden Atyraý týraly arnaýly bólimdi kórip, keýdemizdi qýanysh sezimi kernedi. Elbasymyzdyń Mahambet batyrdyń mereıtoıynda qalamyzdaǵy Isataı-Mahambet eskertkishiniń ashylý saltanatynda sóılegen sózin oqydyq. Kórmege qoıylǵan jádigerdiń barlyǵy da bizdiń egemen el atanǵan jyldardaǵy tarıhı sátterden syr shertip turǵandaı, - dedi «Atyraý-Aqparat» JSHS baspahanasynyń baspageri Artýr Qabdolov.